Kuba və Mərakeş 37 il əvvəl dondurulmuş diplomatik münasibətləri bərpa ediblər.
“Qafqazinfo” “TASS”a istinadən xəbər verir ki, münasibətlərin bərpasına dair saziş Nyu-Yorkda imzalanıb.
Sənədə iki ölkənin BMT-dəki nümayəndələri Anayansi Rodriqes Kamexo və Ömər Hilal imza atıb.
Qeyd edək ki, tərəflər arasında münasibət 1980-ci ildə rəsmi Kubanın Saxara Ərəb Demokratik Respublikasının müstəqilliyini tanımasından sonra pozulmuşdu. Mərakeş Qərbi Saxaranı özünün ayrılmaz hissəsi hesab edərək ona krallıq tərkibində geniş muxtariyyət statusun verilməsini mümkün sayır.