Ukraynanın Krım bölgəsinin Yalta şəhərində keçirilmiş III Beynəlxalq İqtisadi Forumda iştirak etdikləri iddia olunan və bununla bağlı barələrində istintaq hərəkətlərinin aparıldığı bildirilən Azərbaycanın bəzi dövlət və özəl təşkilatları bağlı yayılan məlumatlara münasibət bildirib.
 
"Qafqazinfo" “APA"ya istinadən xəbər verir ki, Azərbaycan Banklar Assosiasiyasının sədri Zakir Nuriyev bildirib ki, rəhbərlik etdiyi qurumun təmsilçilərinin Yalta şəhərində keçirilmiş III Beynəlxalq İqtisadi Forumda iştirak etməsi ilə bağlı yayılan məlumatlar həqiqəti əks etdirmir: “Azərbaycanın Baş Prokurorluğu Azərbaycan Banklar Assosiasiyasına sorğu göndərib. ABA-nı təmsil edən şəxslər Krım bölgəsinin Yalta şəhərində keçirilmiş III Beynəlxalq İqtisadi Forumda iştirak etməyib. Bununla bağlı Banklar Assosiasiyasından Azərbaycanın Baş Prokurorluğuna rəsmi cavab göndərilib”.

“Azərsun Holding”in mətbuat xidmətinin rəhbəri Afiq Səfərov da açıqlamasında təmsil etdiyi şirkətin nümayəndələrinin Yalta şəhərində keçirilmiş III Beynəlxalq İqtisadi Forumda iştirak etmədiyini vurğulayıb. “Bu məlumat doğru deyil. Bizim şirkət və nümayəndələrimizdən heç kim bu forumda iştirak etməyib. Bu forumda iştirak etmədiyimizə görə, Ukrayna prokurorluğu tərəfindən bizə heç bir formada cinayət işi açılmayıb”, - deyə A. Səfərov əlavə edib.  

SOCAR-ın mətbuat katibi Nizaməddin Quliyev də “APA-Economics”ə təmsil etdiyi qurumun III Beynəlxalq İqtisadi Forumunda iştirak etmədiyini bildirib.
 
İqtisadiyyat Nazirliyinin mətbuat katibi Abbas Əliyev də “APA-Economics”ə Azərbaycanın Rusiyadakı Ticarət nümayəndəsinin 20-22 aprel 2017-ci il tarixlərində Yalta şəhərində keçirilən “III Beynəlxalq iqtisadi forum”da iştirak etmədiyini deyib.

Qeyd edək ki, bəzi KİV-də yayılan məlumatlara görə, Ukrayna Təhlükəsizlik Xidmətinin təqdimatı əsasında bu ölkənin Baş Prokurorluğu Rusiya tərəfindən ilhaq olunmuş Krım bölgəsinin Yalta şəhərində keçirilmiş III Beynəlxalq İqtisadi Forumda iştirak edənlərlə bağlı istintaq hərəkətlərinə başlayıb. İqtisadi forumun iştirakçıları Ukraynanın işğal altında olan ərazilərinə daxil olma qaydalarını pozmaqda təqsirli bilinirlər.
 
Forumun iştirakçıları arasında Azərbaycanın 17 iri dövlət və özəl şirkətlərinin nümayəndə heyətinin də olduğu bildirilir.

 ***

"Qafqazinfo" xəbər verir ki, daha iki şirkət bu barədə məlumat yayıb.

“Azərbaycan Beynəlxalq Bankı”  və “Azərkosmos”un yaydığı məlumatda qeyd olunur ki,  şirkətin nümayəndələrinin sözügedən forumda iştirak etmələri barədə yayılan məlumatlar əsassızdır.