Bir neçə gün öncə ölkə mediası Azərbaycan Dövlət Akademik Milli Dram Teatrının direktoru İsrafil İsrafilovun teatrın aktyoru, Xalq artisti Nurəddin Mehdixanlıya töhmət verməsi barədə məlumat yayıb. Buna səbəb kimi xalq artistinin Yaltada keçirilən “Teatr. Çexov. Yalta-2011” şüarı altında təşkil edilən sənət bayramında səhnəyə içkili vəziyyətdə çıxması göstərilib. Həmin vaxt xalq artisti məsələyə münasibət bildirmək istəməsə də, artıq reaksiyasını açıqlayıb. “Qafqazinfo” Nurəddin Mehdixanlının açıqlamasını təqdim edir:

- Mənə sədaqətli olan əziz dostlarıma, ömrümün 35 ilini həsr etdiyim etibarlı, dəyərli tamaşaçılarımın nəzərinə:

Əziz dostlar, hörmətli tamaşaçılarım, son günlərdə bizim Yalta şəhərində Beynəlxalq Teatr Festivalında uğurlu iştirakımızdan sonra mənə qarşı bir qaralama kampaniyası başlayıb.

Çox təəssüflər olsun ki, bəzi mətbuat və kütləvi informasiya vasitələri əsil həqiqətləri, Teatr rəhbərinin mənə verdiyi töhmətin əsil nədənini bilmədən, bu töhmətin ictimaiyyətin nəzərinə, özünə yaxın olan bir jurnalist xanım vasitəsiylə, APA İnformasiya Agentliyinə “ötürən” töhmət verənin, iç məqsədini bilmədən, mənim haqqımda həqiqətən uzaq məlumatlar yaydılar. Teatr rəhbərinin mənə verdiyi töhmət və haqqımda yayılmasında maraqlı olduğu məlumat, ədalətsizliyə, haqsızlıqlara etiraz edən, hər məqamda iş yoldaşlarının haqqını tələb və müdafiə edən, yaltaqlıqdan, məddahlıqdan, rəhbərə yarınmaq kimi əməllərdən uzaq olan, sözü üzə deyən, “dikbaş, sözəbaxmaz”, bütün səhnə həyatı boyu səhnəyə spirtli içki içib çıxan bəzi aktyorlara qarşı sərt və barışmaz olan, bunu səhnəyə xəyanət hesab edən Nurəddin Mehdixanlıya qarşı şantaj xarakterli, profilaktik tədbir xarakterli məlumatdır.

Bu üsullardan sovet dönəmində, vəzifə sahibi olan kommunistlər xalq arasında, cəmiyyətdə, işlədiyi yerdə hörmət və nüfuz sahibi olanları 'sındırmaq, 'zərərsizləşdirmək' üçün geniş və allahsızcasına istifadə edirdilər.

Teatr rəhbərinin ayağını öpməklə məşğul olan bəzi şərəfsizlər, sən demə Teatr rəhbərinə çatdırıblar ki, bəs Nurəddin Mehdixanlı teatrın direktoru olmaq istəyir, belə getsə ola bilər. Məsləhətçilərinin “məsləhətindən” sonra mənimlə görüşmədən, bir rəhbər kimi cəzalandıracağı işçi ilə heç bir söhbət aparmadan, Festivaldan qayıdandan 10 gün keçəndən sonra mənə töhmət verilir. Niyə 10 gün sonra, niyə səfərdən qayıdan kimi yox? Paradoksal deyilmi? Bir tərəfdən televiziya kanallarına çıxır, Teatrın uğurlu çıxışından, tamaşaçılar tərəfindən “bravo” sədaları altında ayaqüstə alqışlanan, Beynəlxalq Teatr Festivalının “Yüksək aktyorluq ustalığına görə” nominasiyası üzrə laureat alan aktyorları tərifləyib qaldırır, mükafatları, Qran Prini tamaşaçılara göstərir, digər tərəfdən tamaşanın baş rol ifaçısını, tamaşanın əsas yükünü daşıyan Nurəddin Mehdixanlını “səhnəyə içkili çıxdığına” görə, adıyla töhmətləndirir.

Bizim mətbuat vasitələri bir az da irəli gələrək Nurəddin Mehdixanlı səhnəyə sərxoş çıxdı yazaraq bir insanın şəxsiyyətini, ləyaqətini nəzərə almadan linc kompaniyasına girişirlər.

Onda adam olandan soruşarlar, bu mükafatı, laureatlığı, kimə və nəyə görə veriblər? Səhnəyə sərxoş çıxan Nurəddin Mehdixanlının baş rolda oynadığı tamaşa, necə oldu ki, o cür beynəlxalq nüfuzlu Festivalın aktyor ustalığına görə ən yüksək mükafatını aldı? Hər halda bu mükafatı, kiminsə boy-buxununa və ya döş nişanına görə verməyiblər. Böyük sənətə, böyük aktyor ustalığı göstərdiklərinə görə Mətanət Atakişiyevaya, Ramiz Novruza, Ələsgər Məmmədoğluna, Əlvida Cəfərova, Xədicə Novruzovaya, Nurəddin Mehdixanlıya veriblər. Azərbaycan milli aktyor məktəbinə veriblər. Bu tamaşanın uğurlu bədii həllini tapmış, tamaşanın müəllifi, quruluşçu rejissoru, əməkdar incəsənət xadimi Bəhram Osmanova verilib.

Əziz dostlar, hörmətli tamaşaçılarım, mən bu hesabatı Sizlərə verməyi özümə borc bildim. Eyni zamanda bir məsələyə də açıqlıq gətirmək istərdim.
Teatrın rəhbərinə və ətrafında olan çuğulçularına bir daha bildirmək istəyirəm ki, mən Nurəddin Mehdixanlının heç vaxt teatrın direktoru olmaq kimi bir arzusu olmayıb, belə bir istəyi də yoxdur. Mənə teatrda provakasiya xarakterli bu tipli suallar verəndə, mən həmişə demişəm ki, mən hələ yaşamaq istəyirəm. Ailəm üçün, övladlarım üçün. Mən həmişə o fikirdə olmuşam ki, rəhmətlik Həsənağa Turabov direktor olmasaydı, hələ yaşayırdı, rəhmətlik Əlabbas Qədirov direktor olmasaydı hələ yaşayırdı. İndi də hər ikisi, yaşayıb-yaradırdılar. Mən əminəm ki, onların hər ikisini direktor kürsüsü, teatrdaxili proseslər vaxtından əvvəl bu dünyadan apardı.

Bizim teatr məbədlərində çox təəssüf ki, qara qüvvələr olub, indi də var. Vaxtilə bu teatrda həmin qara qüvvələr, görkəmli novator rejissor Tofiq Kazımova, 'pyaniskə' adı qoyub mühakimə ediblər, Hamlet Xanızadənin sənət uğurlarını gözü götürməyənlər onu da 'pyaniskə' adıyla şərləyiblər və o teatrı tərk edib. Görürsünüz, mənə qarşı olan da, tanış dəsti-xətdir. Qara qüvvələr yenə öz işlərindədirlər. İşləri yoluna düşməkdə olan, uğurlar qazanmağa başlayan AzDramanı, onun qudrətli aktyor məktəbini gözü götürməyənlər yenə iş başındadırlar, yenə qara əməllərini davam etdirərək, Teatrın daxilində yeni intriqalar, qarşıdurmalar yaratmağa çalışırlar. Amma alınmayacaq. Çünki bu teatr bizimdir. Ömrünü, həyatını, ürəyini, sevgisini bura verənlərindir. Bir də o adamların nəzərinə çatdırmaq istəyirəm ki, Mədəniyyət və Turizm Nazirliyinin tabeliyində olan bütün idarə və müəssisələrin rəhbər vəzifəli şəxslərini, mədəniyyət və turizm naziri cənab Əbülfəz Qarayev vəzifəyə təyin edir və ya vəzifədən çıxarır. Kimin keyfi haranı istədi prinsipi burda keçməz. Bax bunu heç vaxt unutmayın.

Mən bir daha bildirirəm ki, Mən Nurəddin Mehdixanlı, Yalta teatrında tamaşa oynayarkən ,qəti şəkildə heç bir spirtli maddə qəbul etməmişəm, bu mənə məqsədli şəkildə atılan böhtandır. Mən bu insanları öz əxlaq və şərəflərinin, bir də ən əsası, uca ,adil Allahın ixtiyarına buraxıram. Əminəm ki, böyük yalan, Allahlıq iddiasında olanların, şərə, böhtana xidmət edənlərin, insanların uğurlarına sevinməyə qoymayan, ölkəmizin insanlarının təbəssümünü özünə dərd edən, insanlarımızı incitməkdən zövq alan VAMPİRLƏRİN cəzasını verəcək. Çünki, bu adamlar bilə-bilə, Məhz mənim anadan olduğum günə 1 gün qalmış mənə bu 'hədiyyə"ni etdilər.


Məhz 55 yaşımın tamamına belə allahsız, imansız bir 'hədiyyə' etdilər. Amma unutmasınlar, Allah hər şeyi görən və biləndir. Mənə qarşı olan bu aqressivliyin digər ilginc səbəbləri barədə vaxtı gələndə daha ətraflı məlumat verəcəyəm. Son olaraq məni ad günümlə bağlı təbrik edən əziz dostlarıma və hörmətli tamaşaçılarıma təşəkkür edirəm. Sağ olasınız, Var olasınız! TANRI SİZLƏRİ QORUSUN!!!.

Modern.az