O deyib ki, “internet insanlar arasında daha asan ünsiyyət vasitəsidir. İnternet vətəndaşlar və məmurlar arasında bir körpü rolunu oynaya bilər və demək olar ki, bütün sədləri aradan qaldırmaq iqtidarındadır. Elektron hökumət layihəsi çərçivəsində deputatlarla seçicilər arasında olan sədd də aradan qaldırılmalıdır. Seçici deputatına istənilən sualı vermək və cavab almaq hüququna malikdir. Bunun üçün də sosial şəbəkə statusu daşıyan FormSpring platformasından istifadə oluna bilər (www.formspring.com).

Artıq bir çox ölkələrin məşhur siyasətçiləri, parlament üzvləri və rəsmi şəxsləri bu platformada səhifələrini yaradaraq, canlı rejimdə vətəndaşların suallarını cavablandırırlar. Bu platforma, sanki, məhz elə belə bir məqsəd üçün yaradılıb. Mobil operatorlar tərəfindən sürətli 3G texnologiyasının tətbiqi də belə bir xidmətin hamı üçün əlçatan olmasına şərait yaradır”.

R. Nurullayevin sözlərinə görə bir çox parlament üzvləri seçiciləri qarşısında hesabatlılıq daşımırlar. Seçicilər problem və təkliflərinin parlament tribunasında qaldırılması arzusundadırlar. Əlbəttə, ayrı-ayrı seçicilərin sosial problemlərini həll etmək parlament üzvlərinin səlahiyyətinə daxil deyil. Amma, vətəndaşların elə problemləri var ki, onlar ictimailəşməlidir.

“Azərbaycan seçicilərinin Parlamentə inamı sarsılıb. Xalq, seçici Milli Məclisə bir ümid yeri kimi baxmalıdır. Seçici belə münasibət bəsləyirmi? Yox. Buna görə də hər bir deputat öz seçicisi qarşısında cavabdehliyini artırmalıdır. Bu baxımdan, internet üzərindən seçicilərlə ünsiyyət yaratmaq həm özlərinin, həm də bütöv cəmiyyətin xeyrinədir”. Bunu da R. Nurullayev deyib.