Oktyabrın 9-dan notariat kontorlarında şəhid hərbi qulluqçuların birdəfəlik ödəməyə hüququ yaranan vərəsələrinin sənədlərinin qəbuluna başlanılıb.

“Qafqazinfo” xəbər verir ki, bu barədə Əmək və Əhalinin Sosial Müdafiəsi Nazirliyinin mətbuat katibi Fazil Talıbov bildirib. 

Vərəsələr Əmək və Əhalinin Sosial Müdafiəsi Nazirliyinin saytındakı (www.mlspp.gov.az) “BİRDƏFƏLİK ÖDƏMƏ” bölməsində hərbi qulluqçunun adını, soyadını və atasının adını daxil edib, hərbi qulluqçunun vərəsəsinin birdəfəlik ödəməni almaq hüququnun olub-olmadığını öyrənirlər.

Birdəfəlik ödəməni almaq hüququ mövcud olduğu təqdirdə isə notariat kontoruna aidiyyəti üzrə sənədləri təqdim etməklə vərəsəlik şəhadətnaməsi alırlar. Şəhadətnamə verilənlər barədə məlumatlar nazirliyin Mərkəzi Elektron İnformasiya Sisteminə ötürülür və sistemdə birdəfəlik ödəmə veriləcək vərəsələrin elektron qeydiyyatı formalaşır. 

F.Talıbov bununla yanaşı, sığorta ödənişini almadığını iddia edən vətəndaşların olduğunu bildirib:

“Bir sıra hallarda “BİRDƏFƏLİK ÖDƏMƏ” bölməsində axtarış zamanı ayrı-ayrı şəhid hərbi qulluqçuların vərəsələrinin əvvəllər Dövlət Sığorta Kommesiya Şirkəti tərəfindən müvafiq şığorta ödənişi ilə təmin edildiyi barədə cavab çıxsa da, bununla razı olmayan vətəndaşlarımız da var. Sığorta ödənişini almadığını iddia edən vərəsələr tərəfindən nazirliyə rəsmi müraciətlər daxil olur.

Həmin vətəndaşların diqqətinə çatdırırıq ki, bütün bu müraciətlərə diqqət və həssaslıqla yanaşılır. Əmək və Əhalinin Sosial Müdafiəsi Nazirliyi tərəfindən Dövlət Sığorta Kommersiya Şirkəti ilə birgə belə müraciətlərin əsaslı olub-olmadığının araşdırılması işləri aparılır. Araşdırmaların nəticələri barədə müraciət edənlərə müvafiq məlumat veriləcək”.