“Qafqazinfo”nun məlumatına görə, Beynəlxalq Mətbuat Mərkəzində keçirilən tədbiri sədr Azay Quliyev açaraq, Şuranın ötən ildəki fəaliyyəti haqqında danışıb. Bütövlükdə Azərbaycan QHT sektorunun ölkənin sürətli iqtisadi inkişaf tempinə uyğun irəlilədiyini deyən A.Quliyev Şuranın maliyyələşdirdiyi layihələrin ictimai aktuallığını, icra keyfiyyətindəki və hesabatlığındakı müsbət təzahürləri qeyd etməklə bərabər bu sahədəki çatışmazlıqları da vurğulayıb.

Hesabat məruzəsilə Şuranın icraçı direktoru Fərasət Qurbanov çıxış edib. F.Qurbanov il ərzində ölkə QHT-lərinə verilən dövlət dəstəyinin ayrı-ayrı istiqamətləri üzrə yerinə yetirilmiş işlər, eləcə də maliyyələşən layihələr çərçivəsində həyata keçirilmiş tədbirlər haqqında məlumat verib.

Müzakirələrdə çıxış edən QHT rəhbərləri Şuranın fəaliyyətini müsbət qiymətləndirdilər.

Konfransda Şuranın nəşr etdirdiyi “2011-ci ildə maliyyələşən layihələr” və “Azərbaycan qeyri-hökumət təşkilatları” kitablarının təqdimatı olub.

Konfransda Fransa Respublikası Senatının ölkədə qondarma erməni soyqırımını inkar edənlərin cəzalandırılmasına dair 23 yanvar 2012-ci ildə qəbul etdiyi qanun müzakirə edilərək, mahiyyətcə antidemokratik, beynəlxalq hüquqa zidd bir sənəd kimi qiymətləndirildi və bununla bağlı etiraz bəyanatı qəbul edilib. Bəyanatda deyilir:

“Fransa Respublikası Senatının ölkədə qondarma erməni soyqırımını inkar edənlərin cəzalandırılmasına dair 23 yanvar 2012-ci ildə qəbul etdiyi qanun antidemokratik, beynəlxalq hüquqa zidd bir addım, eyni zamanda Fransa tarixi üçün qara ləkədir. Fransa ictimaiyyətinin böyük bir hissəsinin, ayrı-ayrı qeyri-hökumət təşkilatlarının, Senatın Konstitusiya Komissiyasının və digər ictimai-siyasi qurumların etirazlarına baxmayaraq, prezident Nikolya Sarkozinin partiyası Senatda bu qərəzli, heç bir obyektiv əsasa və reallığa söykənməyən qanunun qəbuluna nail oldu. Bu qanun təkcə Türkiyə və Azərbaycana qarşı deyil, bütövlükdə Avropanın insan hüquqları dəyərlərinə, sərbəst ifadə və fikir azadlığına ciddi təhdiddir. Çünki qanun vətəndaşı heç vaxt şahidi olmadığı və ya doğruluğu sübut olunmayan bir faktı inkar etdiyinə görə 1 il azadlıqdan mərhumetmə və ya 45 min avro məbləğində cərimə cəzasına məhkum edir.

Hesab edirik ki, “erməni məsələsi” ilə bağlı tarixi reallıqlar və əsl siyasi gerçəkliklər bu qanunun lehinə səs verənlərə yaxşı bəllidir: çünki məhz onların sələflərinin “dostcasına” təhrikilə erməni millətçiləri XX əsrin əvvəllərində ərazisində yaşadıqları dövlətlərə xəyanət etmiş və həmin “dostların” verdiyi silahlarla regionun dinc türk-müsəlman əhalisinə qarşı soyqırımlar törədərək, erməni xalqını başqalarının əlində təcavüz alətinə və girova çevirmişlər.
Bu qanunun qəbulu ilə Ermənistan - Azərbaycan Dağlıq Qarabağ münaqişəsinin sülh yolu ilə həllində ATƏT-in Minsk qrupunun həmsədr ölkəsi olaraq vasitəçilik missiyasını həyata keçirən Fransa obyektivliyini heçə endirməklə yanaşı bundan sonra bu missiyanı davam etdirməyə mənəvi haqqını da itirmiş oldu.
Biz Fransa, Türkiyə və Azərbaycan vətəndaş cəmiyyəti institutlarını, hüquq müdafiəçilərini bu qanuna qarşı çıxmağa və beynəlxalq apelyasiya instansiyalarında onun antidemokratik, qərəzli və zorakı mahiyyətini ifşa edərək, tətbiqinə yol verməməyə çağırırıq.
Biz Birləşmiş Millətlər Təşkilatına, Avropa Şurası, Avropa İttifaqı və ATƏT-ə müraciət edərək, Fransa Senatının qəbul etdiyi bu qanuna siyasi, hüquqi, mənəvi qiymət verməyə və onun Avropa məkanında yaşayan xalqlar arasında dostluğa və əməkdaşlığa deyil, nifaq və düşmənçiliyə xidmət etdiyini nəzərə almağa çağırırıq.
Biz ümumbəşəri dəyərlərə və beynəlxalq hüquqa zidd olan belə hərəkətlərin, Avropada söz və ifadə azadlığının məhdudlaşdırılmasına, dövlətlərarası münasibətlərin gərginləşməsinə yönəlmiş bu tipli müdaxilələrin qarşısının alınıb dəf ediləcəyinə inam ifadə edirik”.
Bəyanat 250-dən artıq Azərbaycan qeyri-hökumət təşkilatı tərəfindən imzalanıb.