Buraxılış imtahanlarının nəticələri açıqlandı

buraxilis-imtahanlarinin-neticeleri-aciqlandi
Oxunma sayı: 5911

Bakı, Şirvan şəhərlərində və Naxçıvan Muxtar Respublikasındakı orta ümumtəhsil müəssisələrinin buraxılış siniflərində təhsil alan doqquzuncu və on birinci sinif şagirdləri üçün iyunun 21-də keçirilmiş buraxılış imtahanlarının nəticələri açıqlanıb.

“Qafqazinfo” Dövlət İmtahan Mərkəzinə (DİM) istinadən xəbər verir ki, imtahanın nəticələri iyunun 23-ü saat 18:25-dən etibarən mərkəzin internet səhifəsində yerləşdirilib.

İmtahanda iştirak etmiş şagirdlər nəticələr, habelə cavab kartının qrafik təsviri ilə DİM-in internet səhifəsi vasitəsilə tanış ola bilərlər. İmtahan nəticələrini mobil operatorlar (Azercell, Bakcell, Nar) vasitəsilə “iş nömrəsi”ni 7727 nömrəsinə göndərməklə də öyrənmək mümkündür.

9-cu sinif şagirdləri üçün keçirilən imtahanda 37029 nəfərin iştirakı nəzərdə tutulub. Onlardan 419-u imtahana gəlməyib, 14-ü isə qaydaları pozduğu üçün imtahandan xaric edilib. 11-ci sinif üzrə keçirilən imtahanlarda iştirakı gözlənilən 27771 şagirddən 431-i imtahana gəlməyib, 22-si isə qaydaları pozduğu üçün imtahandan çıxarılıb.

Qeyd edək ki, buraxılış imtahanlarının nəticələri ilə əlaqədar müraciətlərə baxılması üçün Apellyasiya Komissiyası yaradılıb. Apellyasiya Komissiyası Bakı şəhəri, Nəsimi rayonu, A. Salamzadə küçəsi, 28 ünvanında (keçmiş Bakı Asiya Universitetinin binasında) fəaliyyət göstərir. Şagirdlər Apellyasiya Komissiyasına iyunun 25, 27 və 28-də saat 10:00-dan 17:00-dək şəxsiyyəti təsdiqləyən sənədin əslini və surətini gətirməklə şəxsən müraciət edə bilərlər.