Rusiya Boks Federasiyasının prezidenti postunu tutan Umar Kremlev ABŞ-da xəstəxanada ölən boksçu Maksim Dadaşovla bağlı açıqlama verib.
“Qafqazinfo”nun “TASS”a istinadən məlumatına görə, Federasiya rəhbəri idmançının ailəsinə başsağlığı verərək onlara ömürlük yardım ediləcəyini bildirib:
“Biz Maksim Dadaşovun ailəsinə ömürlük yardım edəcəyik. Onun ailəsinə dəstəyimizi göstərəcəyik”.
Xatırladaq ki, Dadaşov iyulun 19-da rinqdə Sabriel Matiasla qarşılaşması zamanı başından aldığı çoxsaylı zərbələrdən komaya düşüb. Boksçunun dünən xəstəxanada ürəyi dayanıb.
Maksim Dadaşov 2015-ci ildə Bakıda keçirilmiş I Avropa Oyunlarının iştirakçısı olub.