Daha bir liseydən şikayət

daha-bir-liseyden-sikayet
Oxunma sayı: 3297

“İkinci sinifdə oxuyan qızımın üstünə ağır paltar şkafı aşıb, o vəziyyətdə dərsdə oturdublar”. “Qafqazinfo” xəbər verir ki, bu sözləri övladı AAAF Parkda yerləşən “Zirvə” liseyində təhsil alan Səbinə Qasımova redaksiyamıza şikayətində deyib. O bildirib ki, hadisə ötən həftə baş verib:

“Özəl liseydir, hər şagird illik 3 min manat pul ödəyir. Ancaq bunların sinfə normal paltar şkafı almağa imkanları yoxdur. Sinfə ayağı sınıq paltar dolabı qoyulub. Qızım üst geyimini götürəndə ağır şkaf üstünə aşıb. İki nəfər zorla qaldırıb. Mənə xəbər vermədən qızımı guya müayinə edib dərsdə oturdublar. Axşam ağrıları artdı. Direktor Xəzər Babayevə deyirəm, deyir, yəqin evdə yıxılıb”.

Valideynin sözlərinə görə, şikayətə cavab olaraq direktor uşağın sənədlərini ailəyə verərək başqa məktəb tapmağı tövsiyə edib:

“Heç üzr belə istəmədilər. Deyir ki, Təhsil Nazirliyinə tabe deyil, necə istəsə elə davrana bilər”.

Liseyin direktor müavini Şövqiyyə Məlikova “Qafqazinfo”ya açıqlamasında hadisənin şişirdildiyini və şagirdin başqa məqsədlə liseydən çıxarıldığını bildirib:

“Uşağın üstünə şkaf aşmayıb, sadəcə yerindən tərpənib, müəllim tutub. Valideynin narazılığı isə övladının bölüm sonu keçirilən imtahandan 100 yox, 90 bal toplamasınadır. Əslində 90 bal da 5 qiyməti sayılır. Lakin bununla qane olmayıb uşağın sinfini dəyişmək istəyib. Bu mümkün olmadığı təqdirdə valideynlərlə danışılıb və sənədlər onlara geri qaytarılıb. Bizim onlara heç bir kobudluğumuz olmayıb. Nəzakətlə yola salmışıq”.

Günel Hacı