Mədəniyyət və Turizm Nazirliyi, Təhsil Nazirliyinin 1 nömrəli Uşaq-Gənclər İnkişaf Mərkəzi, Azərbaycan Dövlət Rəsm Qalereyası və Xətai Sənət Mərkəzinin birgə təşkilatçılığı ilə uşaq və yeniyetmələr arasında “Doğma Diyar” respublika uşaq rəsm müsabiqəsi elan olunub
“Qafqazinfo” xəbər verir ki, müsabiqənin yekun sərgisi 26 dekabr 2017-ci il saat 16:00-da Xətai Sənət Mərkəzində keçiriləcəkdir.
Müsabiqənin keçirilməsində məqsəd - ətraf mühitin mühafizəsi, vətənə məhəbbət hissinin aşılanması, milli adət-ənənələrin təbliği, estetik və bədii zövqün formalaşdırılması, yaradıcı qabiliyyətin, obrazlı düşüncə tərzinin inkişaf etdirilməsi, istedadlı uşaq və gənclərin üzə çıxarılmasından ibarətdir.
Müsabiqədə 15 yaşa qədər uşaq və yeniyetmələr doğma diyarımızı tərənnüm edən mövzular üzrə hərəyə 3 əsərilə iştirak etmişlər. Müsabiqədə 800-ə yaxın uşaq, 1700-ə qədər əsəri iştirak edib. Münsiflər heyətinin seçimi ilə II tura keçmiş 150-yə uşağın 160 işinin sərgidə nümayişi nəzərdə tutulur. Sərgidə I, II, III yerlərin qaliblərinə və fərqlənən iştirakçılara həvəsləndirici mükafat və ilk dəfə olaraq müstəsna hal kimi, Azərbaycan Dövlət Rəsm Qalereyasının təsis etdiyi QRAN PRİ Mükafatının xüsusi Fərqlənmə diplomu və mükafatı təqdim olunacaqdır.