Gələn ilin arzuları...

gelen-ilin-arzulari
Oxunma sayı: 1592

Nadir Qocabəyli

Ay ərzində tələb və arzu olunan dörd köşəmi yazdığımdan, gələn ilin ilk on günlüyünədək marağıma səbəb olacaq mühüm bir hadisə baş verməyəcəyi təqdirdə yazı yazmaq fikrim yox idi. Ancaq baş redaktorumuz Elbrus Ərudun “Nadir müəllim, nə əcəb ilin yekunlarıyla bağlı bir yazı yazmırsız?” sualı üzərində düşünməyə bilmədim və qərara gədim ki, köhnə ildə olanlardan yox, yeni ildə görmək istədiklərimdən yazım...

Beləliklə, təzə ildə dünyada və ölkəmizdə əsasən nələrin olmasını istərdim?

Dünyada:

1. Hər şeydən öncə bir neçə ildir Suriyada yüz minlərlə insanın canını alan, milyonları didərgin salan, evləri, yurdları, xanımanları xaraba qoyan, getdikcə genişlənərək bütün bölgə və dünya üçün təhlükəyə çevrilməkdə olan savaşın sona çatmasını;
2. Bütün dünyanı qorxuya salan İŞID adlı qorxunc kabusun varlığına birdəfəlik son qoyulmasını;
3. Dövlətlərin bir-birinə qarşı terrordan, bakterioloji silahlardan istitifadə etməsinə son qoyulmasını;
4. Türkiyə ilə Rusiya arasında başı verən və daha çox sadə insanlara ziyan vuran münaqişənin, iqtisadi embarqoların, informasiya müharibəsinin bitməsini;
5. Enerji resurslarının, xüsusilə də, neftin insanların bədbəxtlik yox, xoşbəxtlik mənbəyinə çevrilməsini;
6. ABŞ və onun Avropadakı müttəfiqlərinin demokratiya və insan haqları şüarlarından digər dövlətlərə qarşı təzyiq vasitəsi kimi istifadə etməsi praktikasına son qoymalarını, başqa ölkələrə və xalqlara daha adil və mərhəmətli davranmalarını;
7. Ukraynadakı iç savaşın bitməsini;
8. Qlobal istiləşməyə qarşı daha real və səmərəli addımlar atılmasını;

Ölkəmizdə:

1. Hakimiyyətin siyasi və iqtisadi islahatlara getməsini;
2. Hakim partiyanın demokratikləşməsini, öz sıralarına mütərəqqi düşüncəli insanları cəlb etməsini;
3. Eyni prosesin müxalifət partiyalarında da getməsini;
4. İqtidarla müxalifət arasında ölkəni siyasi, iqtisadi, mənəvi böhrandan çıxarmaq üçün səmimi dialoqun başlanmasını;
5. Müxalifətin, QHT-lərin xarici asılılıqdan qurtulmasını;
6. Ölkənin ictimai həyatında vicdanlı ziyalıların çəkisinin artırılması üçün münbit şərait yaradılmasını;
7. Yaltaqlığa, mənfəəətpərəstliyə, mənsəbpərəstliyə hesablanmış siyasətə son qoyulmasını;
8. Vəzifəli adamların kadr seçərkən ancaq öz qohum-əqrəbalarına, dost-aşnalarına üstünlük vermələri praktikasından tədricən imtina edilməsini, peşəkarlığa üstünlük verilməsini;
9. Təhsilə, mədəniyyətə, ədəbiyyata, kinoya, teatra ayrılan vəsaitin və diqqətin qat-qat artırılmasını;
10. Orta məktəblərdə pul yığma ənənsinə, ali məktəblərdə rüşvətlə imtahan vermə ənənsinə tamamilə son qoyulmasını;
11. Səhiyyəmizin formal statusdan azad olunmasını, real mahiyyət kəsb etməsini;
12. Televiziyaların və digər media orqanlarının dünya standartları səviyyəsinə çatdırılması üçün təcili hərəkətə keçilməsini;
13. Ölkədə kitab çapının və oxucuların sayının ən azı iki dəfə artmasını;
14. Rüşvətxorluğun, korrupsiyanın, məmur özbaşınalığının cilovlanması üçün görülən tədbirlərin daha da genişləndirilməsini və sərtləşdirilməsini;
15. Hər cür inhisarçılığın aradan qaldırılmasını, azad sahibkarlıq üçün maksimum şərait yaradılmasını;
16. Nazirliklərin, komitələrin, idarələrin, yerli icra hakimiyyəti orqanlarının öz işlərinə daha məsuliyyətli yanaşmalarının, işlərini keyfiyyətli şəkildə qurmalarının təmin olunmasını, bunun üçün ciddi kadr islahatları aparılmasını;
17. İşıq, qaz, su və digər kommunal xidmətlərdə kart sisteminə keçidin tamamlanmasını, əhalinin bu qurumların əliəyri məmurlarıyla hər hansı ünsiyyətinə son qoyulmasını;
18. Polislərin sırf öz vəzifə borclarını yerinə yetirməsini, heç kəsi şərləməməsini, ticarət obyektlərindən xərac almağı tamamilə yığışdırmasını, PPX-ların küçə ticarətçilərindən sədəqə toplamasına son qoyulmasını;
19. İqtidarın siyasi fəaliyyətinə görə heç kəsi həbs etməməsini, müxalifətin də siyasi məhbus adıyla alver etməməsini;
20. Əhalinin mədəni səviyyəsinin yüksəlməsi üçün dövlətin effektiv və uzunmüddətli bir proqram hazırlayıb həyata keçirməsini;
21. Hər cür saxtakarlıqdan, yalançılıqdan, haramzadəlikdən, vicdansızlıqdan imtina edilməsini;
22. Ordumuzda nizam intizamın daha da güclənməsini, əsgərlərimizin ölməməsini, xüsusilə də, qeyri-döyüş şəraitində öldürülməməsini;
23. Qarabağ probleminin həllində, axır ki, bir işıq ucu görünməsini.

Ən ağrılı dərdimiz olan Qarabağı ona görə ən sonda yazdım ki, bizi Qarabağa aparan yol məhz ondan əvvəl sadaladığım problemlərin həllindən keçir.

Qarşıdan gələn Yeni – 2016-cı ilimiz sözün həqiqi mənasında MÜBARƏK olsun!