Generalı qandallayan serjant...

Generalı qandallayan serjant...
Oxunma sayı: 7592

Seymur Verdizadə

Bu hadisəni mənə Nərimanov rayon Məhkəməsində çalışan hakim dostlarımdan biri danışıb. Dediyinə görə, məhkəmə MTN-in keçmiş idarə rəislərindən biri haqda 3 aylıq həbs qərarı çıxarandan sonra polis əməkdaşları onun qoluna qandal taxmaq istəyiblər. Bu vaxt sabiq rəis onların üstünə qışqırıb: “Serjant, hərəkətlərinə fikir ver, mən generalam!”

Gənc çavuş analoji vəziyyətlə tez-tez qarşılaşdığı üçün özünü itirməyib: “Mən əmrə tabeyəm”.

Halbuki özünə general deyib sinəsinə döyən adam başa düşməliydi ki, polis işçisi öz vəzifə borcunu yerinə yetirir, ona təzyiq etməyə lüzum yoxdur. Aydın məsələdir ki, qanunvericilikdəki bu müddəadan həmin generalın da xəbəri var. Amma təkəbbürü üzündən bu cür davranıb. Bəlkə mən də çiyinlərimdə layiq olmadığım general ulduzları daşısaydım, bu cür hərəkət edərdim...

MTN-də aparılan həbslər bir çox qaranlıq məqamlara işıq saldı. Polis ötən ayın 19-dan bəri MTN generallarını həbs etsə də, hələ də bu adamların axırına çıxa bilməyib. İlahi, bir nazirlikdə nə qədər general olar?! Eldar Mahmudov gizləndiyi hücrədən bayıra çıxmalıdır. O, təkcə qanunsuz əməllərinə görə deyil, həm də bu cür yaramaz adamların general ulduzları daşımasına şərait yaratdığı üçün cavab verməlidir.

Sovet dövründə bir qohumum Dövlət Təhlükəsizlik Komitəsində məsul vəzifədə çalışırdı. O, ədəbiyyatı ədəbiyyatçıdan, tarixi tarixçidən yaxşı bilirdi. Son dərəcə mədəni, təvazökar insan idi. Həmin vaxt birinci katib, prokuror, milis rəisi rüşvət alsa da, biz yaxınları qohumumuzun haram tikəyə əl uzatmasını ağlımızın ucundan da keçirmirdik. Həmin mədəni qohumumuzun və onun özü kimi səviyyəli, bacarıqlı iş yoldaşlarının sayəsində adı indi də qorxu ilə çəkilən “KQB” rüşvət bataqlığında çabalayan SSRİ-nin ən elitar qurumuna çevrilmişdi.

Sonra nə baş verdi? Eldar Mahmudov nazir postuna təyinat alandan qısa müddət sonra MTN rüşvət yuvasına çevrildi. Təcrübəli çekistləri əvəzləyən keçmiş “oboxeis”lər var-dövlət qazanmaq ehtirası ilə təhlükəsizlik orqanlarını işgəncə yuvasına döndərdilər. Biz MTN-dən Yerevanda iğtişaş törədib, düşmən ölkəni xaosa sürükləməyi gözlədiyimiz halda onlar Bakıda sahibkarlara qan uddurmağa girişdilər. Ortadakı faktların yarısı belə bu adamların üzünə tüpürməyə əsas verir. Bir dəfə yazmışam, amma növbəti dəfə təkrarlamaqda zərər görmürəm: ötən 11 ildə biz ancaq Allahın mərhəməti sayəsində sağ qalmışıq. Eldar Mahmudovun başı reketçilik edib, pul qazanmağa qarışanda bizi xəta-bəladan Yaradan özü hifz edib.

P.S. Həmin polis çavuşunun yerinə olsaydım, general olduğunu gözə soxan keçmiş rəisə belə deyərdim: “Sən general yox, gədasan. Əsl general kasıb ticarətçini zirzəmiyə salıb, ondan 200 manat rüşvət almağı ləyaqətinə sığışdırmaz”.

P.P.S. General olmaq asandır, amma general kimi yaşamaq çətindir. General kimi yaşamağı bacarmayanlar məhbus ömrü sürməyə layiqdirlər...


Daha tez məlumatlanmaq üçün yeni Facebook səhifəmizi