Gömrük Komitəsindən şikayətçinin məktubuna reaksiya

gomruk-komitesinden-sikayetcinin-mektubuna-reaksiya
Oxunma sayı: 2514

Ötən gün bəzi internet resurslarında gömrük orqanları, xüsusilə də Avtonəqliyyat Baş Gömrük İdarəsi haqqında Masallı rayon sakini Abıyev Cəlal Hamlet oğlunun məktubuna əsasən məlumat yayımlanıb.

“Qafqazinfo”nun Dövlət Gömrük Komitəsinə istinadən verdiyi xəbərə görə, məlumatda Masallı rayon sakini Abıyev Cəlal Hamlet oğlundan xaricdən gətirdiyi nəqliyyyat vasitəsinə görə qanunvericilikdə nəzərdə tutulandan daha artıq gömrük rüsumunun alındığı iddia edilir.

DGK bildirir ki, cari ilin iyun ayının 11-də Abıyev Cəlal Hamlet oğlu xaricdən gətirdiyi nəqliyyat vasitəsinin gömrük rəsmiləşdirilməsini həyata keçirmək üçün Avtonəqliyyat Baş Gömrük İdarəsinə müraciət edib. Rəsmiləşdirilmə üçün təqdim edilən sənədlərin araşdırılması prosesində risk analizlərinə əsasən avtomobilin gömrük dəyərinin aşağı göstərildiyi müəyyən edilib. Bu barədə Abıyev Cəlal Hamlet oğlu ilə qanunvericiliyə uyğun olaraq müvafiq izahat işləri aparılıb. Gömrükçülərin haqlı tələblərinə etiraz etməyən Cəlal Abıyev dövlət büdcəsinə çatacaq gömrük vergi və rüsumlarının bank vasitəsilə ödənişini həyata keçirib.

Dövlət Gömrük Komitəsi bir daha bildirir ki, Abıyev Cəlal Hamlet oğlunun yazdığı bildirilən məktubda irəli sürülən iddialar tamamilə əsassızdır və aparılan araşdırmalar nəticəsində bütün gömrük əməliyyatlarının şəffaf, asan və sürətli şəkildə həyata keçirildiyi məlum olub.