Cəsur görünüşə hazır olun, çünki Lexus bu dəfə öz iddialarını da qabaqladı: təqdim olunan yeni ES modeli biznes sedan seqmentindəki bütün gözləntiləri aşdı. Komfort, dəbdəbə və eleqantlığına görə həmişə yüksək qiymətləndirilən ES-in yeni modelində bu keyfiyyətlər tamamilə fərqli platformada davam etdirilir: avtomobil gövdəsinin dizaynı indi daha dinamik və cəsarətlidir, idarəetmə komfortu böyük zövq verir.         

“Qafqazinfo” xəbər verir ki, Lexus ES-in Buta Palace-da keçirilən və məşhur tarzən Şəhriyar İmanovun özünəməxsus ifası ilə açılan rəsmi təqdimat mərasimində Lexus-un yerli təmsilçiləri, jurnalist və  Lexus innovasiyaları ilə maraqlanan qonaqlar iştirak edib. Tədbirdə çıxış edən Toyota Qafqaz şirkətinin prezidenti Mitsuru Konişi ES modelinin Azərbaycanda çox böyük populyarlıq qazandığını bildirib. “Bizim mühəndis  və dizayner heyəti çox çətin məqsəd ilə üzləşib: artıq çox keyfiyyətli olan maşını daha da təkmilləşdirib ideala çatdırmaq. Model üzərində böyük bir iş aparılıb ki, yeni ideyaların tətbiqi həm Azərbaycanda, həm də bütün dünyada müştərilərin məmnuniyyətini qazansın”. Bu sözləri deyən Konişi ES modelinin yeni nəslinin yapon dizayn ənənələrinə sadiq qaldığını və bunun bütün Lexus model sırası üçün çox önəmli olduğunu qeyd etdi. Sitat: “Mən əminəm ki, yeni ES müştərilərin bütün arzularını qarşılamağa hazırdır və onların gündəlik həyatının tərkib hissəsi olacaq”.

Mərasimin informativ hissəsi musiqi ilə davam edib. Müğənni Azad Şabanovun çıxışından sonra səhnəyə Rusiyanın məşhur pop qrupu Serebro dəvət olunub. Əyləncəli fasilədən sonra qonaqların böyük səbirsizliklə gözlədiyi və gecənin ən mühüm anı – yeni Lexus ES modelinin rəsmi təqdimat məqamı yetişdi. Özəl hazırlanmış video instalyasiya, rəngarəng işıq və xüsusi səs effektləri altında salona çıxarılan yeni ES elə ilk baxışdan zalda böyük təəssürat oyadıb.

Yeni nəsil Lexus ES  rahat və rəvan idarəni təmin edən 3 müxtəlif mühərrik növü ilə təklif olunur: 4 silindrli 2,0 və 2,5 litrlik mühərrik və 302 at gücündə olan 3,5 litrlik V6 mühərriki.  ES yeni Global Architecture-K platforması üzərində yaradılıb. Bu da dizaynerlərə həm valehedici görünüşə, həm də zövqlü idarəetməyə malik ES  yaratmaq imkanı verib. Yeni tanıdılan F SPORT-un komplektasiyası isə digərlərindən xeyli fərqlidir, belə ki, o, yeni ES-in idman ruhunu vurğulayır, eyni zamanda da maksimum sürüş keyfiyyətini və dəqiq nəzarəti təmin edir. Bütün Lexus modellərinin interyeri həm sürücünü, həm də sərnişinləri rahat və geniş sahə ilə təmin edir. Arxa oturacaqdakı sərnişinlərin komfortu hər zaman ES-in özəl cəhəti olub. Yeddinci nəsil ES genişlik özəlliyini qoruyaraq  elə bu mirasa əsaslanır.

Qeyd edək ki, avtomobilin profili şıq kupe stilində işlənib –  tavan, kapot və baqajın aşağı relyefli cizgiləri sayəsində ES daha geniş görünür. Təkər sistemi və kapot uzadıldığı üçün axıcı gövdə dizaynı əldə olunub. Salon içində səssizliyin yüksək səviyyəsi, kənar səslərə nəzarət yeni ES modelində daha diqqətlə tənzimlənib. Bütün sərnişinlərə qüsursuz rahatlıq vəd olunur: sıralar arasındakı məsafə artırıldığına görə iç məkan daha komfortludur. Avtomobillə səyahət üstün güvənliklə təmin olunur: ən yeni “Lexus Safety Sistem + ” indi piyadaları həm gecə,  həm də gündüz aşkar etmək xüsusiyyətinə malikdir.    

Yeni ES-in təqdimat mərasimi Lexus ənənəsi ilə bitib. Avtomobillə yaxından tanış olmaq  üçün səbirsizliklə gözləyən qonaqlar səhnəyə dəvət olunub. Dizayn, lüks, komfortlu idarə və innovativ texnologiyada radikal dəyişiklikləri özündə birləşdirən ES şıq görünüşü ilə izləyicilərin böyük rəğbətini qazanıb. 

Lexus-un yeni modelləri barədə ətraflı məlumat almaq üçün www.lexus.az saytını ziyarət edə bilərsiniz.

Əlaqə telefonu: (012) 490 50 50