“Məndən ikincisi gəlməyəcək” - Baş məşqçi

“Məndən ikincisi gəlməyəcək”
Oxunma sayı: 1478

Azərbaycan Premyer Liqasında XXIII turun “Kəpəz” – “Qarabağ” (0:1) oyunundan sonra təşkil edilən mətbuat konfransında Gəncə klubunun baş məşqçisi Yunis Hüseynov jurnalistlərin suallarını cavablandırdı.
 
“Qafqazinfo” xəbər verir ki, o, əvvəlcə matç barədə fikirlərini bildirib:
 
- “Qarabağ”ı təbrik edirəm. Mübarizə apardıq. Rəqib güclü, top saxlayan komandadı. Düzdü, bunlar şablon sözlərdi. Ancaq reallıqdı. Xal qazanmaq istəyirdik. Komandamdan razı qaldım. İmkanlarımız oldu, lakin istifadə edə bilmədik. Qarşıdakı oyunlara köklənəcəyik.
 
- Dieqonu sonradan meydana buraxdız, lakin tezliklə əvəzlədiz...
- Onu meydana buraxdım ki, meydanın mərkəzində top saxlasın. Fikirləşdim ki, təcrübəsi ilə komandaya kömək edəcək. Lakin ümidlərimi doğrultmadı. Buna görə, tez əvəzlədim.
 
- Düşünmürsüz ki, bu, futbolçuya təsir edə bilər?
- Ola bilər. Lakin futbolçu meydançada ona olan etimadı doğrultmadı.   
 
- Hər iki komandanın məşqçilər korpusunda Azərbaycanın vaxtilə güclü futbolçuları olmuş mütəxəssislər qərarlaşıb. Bu oyunçular komandasını arxasınca apara bilən futbolçular idi. Lakin bu gün ölkə futbolunda bu cür oyunçular yoxdu. Sizcə, bunun səbəbi nədi?
- İndiki futbolçulara hörmətlə yanaşıram. Lakin yeni Yunis Hüseynov gəlməyəcək. Eləcə də, Vidadi Rzayev və digərləri. İndinin futbolu ilə o vaxtkı futbol da tam fərqli idi. Futbolçular komandanı arxasınca aparacaq səviyyəyə çatmaq üçün öz üzərində işləməlidilər. Əgər çalışsalar onlar da bu cür futbolçu ola bilərlər.


Daha tez məlumatlanmaq üçün yeni Facebook səhifəmizi