“Müharibə iştirakçılarının orta aylıq təqaüdü 400 manata yaxındır” - Nazirlik

muharibe-istirakcilarinin-orta-ayliq-teqaudu-400-manata-yaxindir
Oxunma sayı: 805

Ölkəmizdə daim güclənən sosial siyasətin əsas istiqamətlərindən biri də İkinci Dünya müharibəsi iştirakçılarının sosial müdafiəsinin gücləndirilməsinə yönəlib.

Əmək və Əhalinin Sosial Müdafiəsi Nazirliyindən (ƏƏSMN) “Qafqazinfo”ya verilən məlumata görə, prezident İlham Əliyevin müvafiq Fərman və Sərəncamı ilə İkinci Dünya müharibəsi əlillərinə və digər iştirakçılarına Azərbaycan Respublikası Prezidentinin aylıq təqaüdləri təyin olunaraq ödənilir və ötən dövrdə bu təqaüdlərin məbləği mütəmadi olaraq artırılıb.

Bu istiqamətdə növbəti mühüm addım kimi, dövlət başçısının 15 aprel 2019-cu il tarixli Fərmanına əsasən aprelin 1-dən müharibə əlilləri üçün təqaüdlər I dərəcə əlilliyi olanlar üçün 250 manata, II dərəcə əlilliyi olanlar üçün 230 manata, III dərəcə əlilliyi olanlar üçün 210 manata çatdırılıb. Həmçinin I dərəcə əlilliyi olanlara qulluq edənlər üçün 15 aprel 2019-cu il tarixli digər Fərmanla aylıq təqaüd (50 manat) təsis edilib.

Qeyd edək ki, İkinci Dünya müharibəsi iştirakçılarının sayı hazırda 400 nəfərə yaxındır ki, onlardan 250 nəfəri İkinci Dünya müharibəsi əlilləridir. İkinci Dünya müharibəsinin digər iştirakçılarına Prezidentin aylıq təqaüdü isə dövlət başçısının 15 aprel 2019-cu il tarixli Sərəncamı ilə 150 manata çatdırılıb.

Prezidentin aylıq təqaüdü ilə yanaşı, İkinci Dünya müharibəsi veteranları əmək pensiyası ilə təmin edilirlər və onlara pensiya təyin olunarkən pensiyalarına qanunvericilikdə nəzərdə tutulmuş qaydada əlavələr hesablanıb. Cari ilin 01 aprel tarixinə ölkəmizdə İkinci Dünya müharibəsi iştirakçılarının orta aylıq pensiya məbləği 400 manata yaxındır.

23 aprel 2019-cu il tarixli Sərəncamla 400-ə yaxın İkinci Dünya müharibəsi iştirakçısının hər birinə 1000 manat, qalanlarına, yəni 8,9 minə yaxın şəxsin hər birinə 500 manat məbləğində birdəfəlik maddi yardım ödənilib.

ƏƏSMN tərəfindən bu vaxta qədər 102 nəfər İkinci Dünya müharibəsi əlili mənzillə, bu təbəqədən olan 1117 nəfər şəxs minik avtomobili ilə təmin olunub. İkinci Dünya müharibəsi iştirakçılarının bərpa müalicəsi, sanator-kurort yollayışları ilə təminatı və s. sahələrdə də müvafiq işlər görülür, ehtiyac duyduqları hallarda onlara evlərində sosial xidmətlər də göstərilir.