“Xəzər Lənkəran” klubu dünən final oyunundan sonra stadionda baş verən əlbəyaxa dava ilə bağlı rəsmi açıqlama verdi.

Klubun mətbuat xidmətinin rəhbəri Hüseyn Cəbrayıloğlu “Qafqazinfo”ya açıqlamasında Azərbaycan kubokunun finalında belə biabırçılığın yaşanmasını “Xəzər Lənkəran” olaraq pislədiklərini bildirib: “Amma çəkilən video görüntülərə, şəkillərə diqqətlə baxmaq yetər ki, kütləvi davanın kimin başladığını görəsən. Meydanda bircə dənə də olsun “Xəzər Lənkəran” ın mühafiəzəçisi yoxdur. Amma “Neftçi” tərəfdən bir rota mühafizəçi futbolçularımızın üzərinə düşüb xəsarət yetirdi. Dünən Respublika Günündə “Neftçi” klubunun idman direktoru Güloğlan Cabbarov “Xəzər Lənkəran”ın yeniyetmə futbolçusu, Azərbaycan millisinin şərəfini qoruyan Kamran Abdullazadəni qanına qəltan etdi.

Çox təəssüf ki, bu olay ölkə futboluna rəhbərlik edən insanların gözü qarşısında baş verdi. Bu həmin Güloğlan Cabbarovdur iki ildir adı ölkə futbolunda qalmaqalda hallanır. İndiyə qədər iki digər klubun futbolçusunu döymüşdü, bu da üçüncü hadisədir. Amma bu adamı durduran yoxdur. Mediada yayılan şəkillərdə ağ köynəkli adam Cabbarovdur. Digər tərəfdən rəqibin qapıçısı təxribatı hərəkətlərə yol verib aranı qatdı. Biz dünən sübut etdik ki, finala Anar Salmanovun gücünə yox, “Xəzər Lənkəran” olaraq öz gücümüzə gəlmişik. Avropaya da öz gücümüzıə gedirik. İnsallah, Azərbaycan futbolunu dava-dalaş yox, gözəl oyunla təmsil edəcəyik”.

İqbal