Moskvada “Neolit” kafesində bir qrup çeçen və azərbaycanlı arasında baş verən münaqişə ilə bağlı işdə gözlənilməz dönüş baş verib. Kütləvi davadan az sonra öldürülən 52 yaşlı azərbaycanlı avtoritet Qərib Orucovun qətlində terrorçu Lors Xamiyev ittiham edilib. 

“Qafqazinfo” xəbər verir ki, bu barədə “Moskovskiy komsomolets” hüquq-mühafizə orqanlarındakı mənbəsinə istinadən məlumat yayıb. Lors Xamiyev ümumilikdə saxlanılan beş nəfərdən biridir. 35 yaşlı Xamiyev cinayətkar dəstənin keçmiş iştirakçılarındandır, Çeçenistan lideri Ramzan Kadırova qarşı sui-qəsd təşkil etdiyi üçün həbs yatıb. 

Xamiyev və daha bir çeçenli Həmid Cəbrayılova “milli və ya dini ədavət zəminində bir qrup şəxs tərəfindən törədilən qətl” maddəsi üzrə ittiham irəli sürülüb və fevralın 19-da Kuzminski məhkəməsi onları həbs edib. 

Digər saxlanılan 3 nəfərin taleyi isə bu günlərdə həll olunacaq. Məhkəmə onlar barəsindəki həbs qətimkan tədbirini 72 saata qədər uzadıb. Mənbənin sözlərinə görə, hər üç şübhəli artıq “yalan detektoru”ndan keçib və istintaq onların təsadüfən həmin olayın mərkəzinə düşdükləri qənaətinə gəlib. 

İstintaq şübhə etmir ki, Səmərqənd bulvarında baş verən qətllə “Neolit” kafesindəki münaqişə eyni zəncirin halqalarıdır.

Nəşr yazır ki, Çeçenistan vətəndaşı olan Lors Xamiyev 2007-ci ilin mayında terrorçuluq, silah saxlama, həmçinin Ramzan Kadırova qarşı sui-qəsd hazırlamaqda ittiham olunaraq saxlanılıb və haqqında 8 il həbs qərarı verilib. Lakin 2015-ci ildə erkən azadlığa buraxılıb.