Hər kəs onu klassik musiqinin kraliçası adlandırır. Həm istedadı, həm də ecazkar gözəlliyi ilə son vaxtlar dünya mediasının diqqətini çəkən 33 yaşlı özbək gözəl Lola Astanova üçün bu xitab heç də qeyri-adi deyil. 

Hər hansı bir şəxsdən pianoçu təsvir etməyini istəsəniz o, sizə kostyumda, illərin beynə qazımış olduğu bir görkəm nəql etməyə başlayacaq. Elə bu səbəbdəndir ki, Lola klassik musiqi tarixinə novator kimi imza atdı.

“Qafqazinfo” xəbər verir ki, Lola Daşkənddə doğulsa da, uşaq yaşlarından Rusiyada yaşayıb. Onun musiqiyə olan marağı isə anasından gəlir. Belə ki, anası musiqi müəlliməsi olduğu üçün onun bu istedadını tez duyur və Lola piano dərsləri almağa başlayır. 

Bir çox konsertlərdə çıxış edən gənc pianoçu ona geyindirilən kostyumlardan sıxılır və öz imicini yaratmaq qərarına gəlir. Füsunkar bədənə sahib olan Lola geyimlərinə də xüsusi diqqət edir. Odur ki, Lola ifa etdiyi əsərlərlə yanaşı, hazırda imici ilə də diqqət mərkəzində qalmağı bacarıb. 

Hər zaman üzərində bahalı dikdaban ayaqqabı, onun üçün hazırlanmış libaslar gördüyümüz pianoçunun sözlərinə görə, ciddi musiqi sıxıcı geyimlər demək deyil:

“Klassik musiqinin tanıtımı ilə bağlı nələrinsə dəyişməli olduğunu düşünürəm. Heç bir şey eyni qalmır. Musiqi muzeydə hər hansı bir eksponant deyil, onu ifa edən şəxs tərəfindən yaşadılır. Və XXI əsrdə gəncləri cəlb etmək istəyiriksə, təqdimat çox vacibdir. İnsanlar eşitməklə yanaşı, hərdən görmək də istəyir. Ancaq etiraf edim ki, bəzən məni dinləyən şəxslərin fikri geyimimə gedir və sərin bir hissəsini qaçırırlar”. 

Bunun nəticəsidir ki, hazırda pianoçu sosial şəbəkələrdə maraqla izlənilən dünya ulduzlarından biridir. Yarım milyona yaxın izləyicisi olan gənc xanımın paylaşdığı videolara milyonlarla insan baxır. 

Müsahibələrin birində jurnalist onun klassik musiqinin Ledi Qaqası adlandırıldığını söyləyir və digər janrlarda ifa edib etməyəcəyi ilə maraqlanır. Lolanın cavabı isə belə olur: “Klassik musiqiyə aşiqəm ancaq özümü hər hansı bir çərçivəyə salmağı da sevmirəm. Kim bilir, bəlkə də dinləyicilərimə yaxın gələcəkdə sürprizlərim olacaq”.

Lolanı sırf geyimi ilə diqqət çəkməkdə qınayanlar olsa da, məşhur amerikan pianoçu Byron Janis onu musiqinin ilahəsi adlandırıb.

Gözəl pianoçu bir neçə dövlət başçısı, eləcə də, ABŞ prezidenti Donald Trampın da diqqətindən yayınmayıb. Ağ evin hazırki sahibi Lolanın iştirak etdiyi festivalları maraqla izləyir və mümkün qədər iştirak etməyə çalışır. 

Günel Hacı