“2016- ci  ildə Cinayət Məcəlləsinə 148-1 maddəsi əlavə edildi. Bu maddə internet resurslarında təhqirlərlə bağlıdır. Buna görə cərimə və azadlıqdan məhrumetmə cəzası var. Ancaq qanunun tətbiqində boşluqlar var”.

“Qafqazinfo” xəbər verir ki, bunu parlamentin Hüquq siyasəti və dövlət quruculuğu komitəsinin sədri Əli Hüseynli həmkarlarının sosial şəbəkələrin tənzimlənməsi ilə bağlı çıxışlarına şərh verərkən deyib.

 O, ölkə başçısının şəhid ailələri ilə bağlı qərarlarına diqqət yönəldib: “Təbii ki bu problemin araşdırılması ilə bağlı  zaman tələb olunurdu.

Amma baxın internetdə radikal müxalifətin nümayəndələri necə davranır? Onlar şəhid ailələrini təhqir edir və deyir ki, nə üçün prezidentlə əllə görüşdünüz və onlarla şəkil çəkdirdiniz. Azərbaycanda bu qədər şəhid olmasının günahı 1992-ci ildə hakimiyyətdə olanlardır. Ona görə hesab edirəm ki, sosial şəbəkələrdə yayılan təhqirlə bağlı qanunvericilkdə heç bir problem yoxdur, sadəcə onun tətbiqi ilə bağlı işlər görmək lazımdır”. 

 Məsələyə müdaxilə edən spiker Oqtay Əsədov qeyd edib ki, Milli Məclis qanunları müfəssəl işləyir, ancaq sonra onların tətbiqində problemlər çıxır: “Hüquq siyasəti və dövlət quruculuğu  komitəsinə tapşırmışam ki, bu məsələyə yenidən baxaq. Nəsə tədbir görmək lazımdır ki, belə təhqirlər aradan qalxsın. Mən xaricdə yaşayanları demirəm. Daxildəkilərə bəs nə deyək? Milli Məclisin deputatlarına nə gəldi yazırlar. Bizim mentalitet yol vermir ki, belə təhqirlər olsun”.

 Günel Türksoy