Sabah Azərbaycanda zəlzələ gözlənilir?

sabah-azerbaycanda-zelzele-gozlenilir
Oxunma sayı: 11756

“Respublika ərazisində gözlənilən hava şəraiti ilə əlaqədar qabaqlayıcı tədbirlərin görülməsi, əfsus ki, bəzi insanların Bakıda zəlzələ olacağına dair heç bir əsası olmayan, həqiqəti əks etdirməyən və vətəndaşları heç nədən narahat edən xəbərlər yaymasına səbəb olub”.
 
“Qafqazinfo” xəbər verir ki, bu barədə Modern.az-a Azərbaycan Milli Elmlər Akademiyasının (AMEA) nəzdində Respublika Seysmoloji Xidmət Mərkəzinin İnformasiya şöbəsinin müduri Vüsalə Rafiqqızı məlumat verib.
 
V.Rafiqqızı vətəndaşlar tərəfindən daxil olan  çoxsaylı müraciətlərə aydınlıq gətirərək bildirib ki, meteoroloji amillərin zəlzələ ocaqları ilə hər hansı əlaqəsi yoxdur: “Hazırda respublika ərazisində seysmik aktivlik fon səviyyəsindədir. Bakıda gözlənilən güclü küləklə bağlı müvafiq qurumlar tərəfindən edilən xəbərdarlıqlar müsbət və vaxtında görülmüş tədbirlərdir. Odur ki, vətəndaşlarımızdan Respublika Seysmoloji Xidmət Mərkəzinə istinadı olmayan hər hansı xəbərə inanmamağı, media nümayəndələrimizdən isə bu səpkili xəbərləri dəqiqləşdirmədən yaymamağı xahiş edirik”.

Qeyd edək ki, Ekologiya və Təbii Sərvətlər Nazirliyi ölkə ərazisində yanvarın 16-dan 17-nə keçən gecədən başlayaraq 18-i gündüzədək təhlükəli hidrometeoroloji hadisənin gözlənildiyi ilə bağlı məlumat yayıb.