Səməd Vurğunun ailəsi "Oba"nı məhkəməyə verəcək

Səməd Vurğunun ailəsi
Oxunma sayı: 160

"Oba" marketlər şəbəkəsinin yayımladığı reklam çarxı narazılıqlara səbəb olub.

"Qafqazinfo" PrimeTime.Az-a istinadən xəbər verir ki, reklam çarxı Azərbaycanın görkəmli xalq şairi Səməd Vurğunun "Azərbaycan" şeirindən götürülmüş misraların dəyişdirilməsi əsasında çəkilib. Bu isə Səməd Vurğunun ailəsində böyük narazılıq yaradıb.

Məsələ ilə bağlı sayta açıqlama verən şairin nəvəsi Nigar Vəkilova belə bir reklamın çox iyrənc və səviyyəsiz olduğunu bildirib: "Mən bu məsələni eşidən kimi Səməd Vurğunun ev muzeyinin direktoru Nüşabə xanım Vəkilovaya xəbər verdim. Axı bu cür şeirin misralarının bir hissəsini dəyişdirib belə bir aşağılayıcı reklamda necə çəkib yayımlaya bilərlər ki? Kənardan çox iyrənc görünür. Biz bu səviyyəsiz reklam çarxı ilə bağlı ciddi tədbirlər görəcəyik. İlk tələbimiz o reklamın yayımının dayandırılmasıdır. Məhkəməyə müraciət etməyi də düşünürük, amma hələ müraciət etməmişik".

"Oba" Marketlər Şəbəkəsindən isə "Qafqazinfo"ya bildirdilər ki, reklam çarxının yayımı bugündən dayandırılıb: "Reklam çarxı autsorsinq əsasında radio tərəfindən hazırlanıb. Bununla bağlı artıq radio ilə əlaqə saxlayıb, səsləndirilən iradları bildirmişik. Bugündən etibarən biz həmin səsləndirmənin yayımlanmasını dayandırmağı qarşı tərəfdən tələb etmişik. Bundan başqa Nigar xanımla əlaqə saxladıq, OBA marketlər şəbəkəsi adından yaranan anlaşılmazlığa görə üzrxahlıq etdik və  Nigar xanım bizim üzürxahlığımızı qəbul etdi".

Xatırladaq ki, "Azərbaycan" şeiri 1933-cü ildə yazılıb. 1959-cu ildə şeir "SSRİ xalqları ədəbiyyatı üzrə müntəxəbat"a daxil edilib. Şeirin sözlərinə bəstəkar Ələkbər Tağıyev tərəfindən eyniadlı "Azərbaycan" mahnısı bəstələnib. Qeyd edək ki, sözügedən reklam çarxı "El bilir ki, sən mənimsən, alış-veriş mərkəzimsən" misraları əsasında hazırlanıb və bir neçə radioda yayımlanır.  

 


Daha tez məlumatlanmaq üçün yeni Facebook səhifəmizi