Şeyx dünya liderlərinə müraciət etdi

seyx-dunya-liderlerine-muraciet-etdi
Oxunma sayı: 1087

Bu gün Qafqaz Müsəlmanları İdarəsində Xocalı soyqırımının 27-ci ildönümü ilə bağlı tədbir keçirilir.

"Qafqazinfo" xəbər verir ki, tədbirdə çıxış edən Qafqaz Müsəlmanları İdarəsinin sədri Şeyx Allahşükür Paşazadə əvvəlcə dünya dini liderlərinə və parlamentlərinə, BMT, ATƏT, AŞ, İƏT və İnsan Hüquqları üzrə Avropa məhkəməsinə müraciəti səsləndirib. Onun sözlərinə görə, Qafqazın qanlı terror qurbanı, Azərbaycan şəhəri Xocalıda törədilən vəhşiliklər hələ də dünya ictimaiyyəti tərəfindən pislənməyib və layiqli qiymətini almayıb: "Xocalı vəhşiliklərin kulminasiya nöqtəsidir.

Ancaq bu vəhşiklikləri törədənlər hələ də hüquqi cəzasını almamışdır. Ermənistan heç bir beynəlxalq qurumun qərar və qətnamələrinə məhəl qoymur. Cəzasızlığından ilhamlanan Ermənistan daim atəşkəsi pozmağa cəhd edir, sülh danışıqlarında qeyri-konstruktiv mövqe nümayiş etdirir. Azərbaycan xalqına qarşı törədilən cinayətləri ört-basdır edənlər, onların havadarları bizə qarşı törədilən terrorizmə haqq qazandırmaq niyyətindədir. Həqiqət bundan ibarətdir ki, bütov bir şəhərin məhv edilməsi soyqırım aktıdır. Növbəti dəfə beynəlxalq təşkilatalara müraciət edirik ki, bizim soyqırımımıza biganə qalmasınlar. Qarabağın münaqişəsinin həllində bizə kömək etsinlər. Ən əsası isə haqqın tərəfində olsunlar. Qeyd edim ki, Azərbaycanın bütün məscidlərində və dini məclislərdə cümə günü şəhidlərin şəninə xütbələr veriləcək, onların əziz ruhuna Qurani-Kərim, dualar oxunacaq".

Tədbirdə çıxış edən Dini Qurumlarla İş üzrə Dövlət Komitəsinin sədri Mübariz Qurbanlı deyib ki, Xocalı soyqırımı ilə əlaqədar Azərbaycanda və digər ölkələrdə tədbirlər keçirilir: "Bu bizim şəhidlərin qarşısında olan borcumuz və dünya ictimaiyyətinə daha dəqiq çatdırmaq vəzifəmizdir. Cinayətləri unutmamalı və dünyanı məcbur etməliyik ki, bunu yaddaşlarına həkk etsinlər. Bu, insanlıq əleyhinə törədilən cinayətdir və bunun müddəti yoxdur. Yəni, bu cinayət daimidir. Həmin cinayətkarlar ədalət mühakiməsi qarşısında harada olmalarından asılı olmayaraq cavab verməli olacaq".

Günel Türksoy