“15 İyun Azərbaycan xalqının məhv olmaqdan xilas günüdür”

15-iyun-azerbaycan-xalqinin-mehv-olmaqdan-xilas-gunudur
Oxunma sayı: 1084

“15 İyun Azərbaycan xalqının faciələrdən, dağılmaqdan, müstəqilliyini itirməkdən, məhv olmaqdan xilas günüdür”.

“Qafqazinfo” xəbər verir ki, bunu Milli Məclisin deputatı Ceyhun Məmmədov parlamentin növbədənkənar sessiyası üzrə iyunun 14-də keçirilən iclasında çıxışı zamanı deyib. 

O bildirib ki, Azərbaycanın müasir müstəqillik tarixini bir neçə mərhələyə bölsək, həmin dövr tarixin ən ağır günlərindən biri kimi xarakterizə edilməlidir: “Həmin ağır gündə bütün Azərbaycan xalqının gözü Naxçıvana, Ulu Öndərə dikilmişdi. Çünki ermənilərin məqsədi bütövlükdə Azərbaycanı işğal etmək idi. Azərbaycanı yalnız Ulu Öndər xilas edə bilərdi. Heydər Əliyev həyatını riskə ataraq ölkəmizi bütün müsibət və faciələrdən xilas etdi”.

“Təəssüf ki, bəzən həmin dövrü xatırlayarkən bəzi insanlar çətin vaxtları unudurlar. Halbuki insanlar adi çörəyi belə tapa bilmirdilər. Həmin günlərdən bu günə gəlib çıxmışıq. Bugünkü qələbəmizin və zəfərimizin təməli elə həmin vaxtdan qoyulub”, - C.Məmmədov əlavə edib.

Zaur Mirzə