“Qafqazinfo”nun məlumatına görə, ermənilər həmin səhifədə Naxçıvanın guya qədim Ermənistan torpağı olduğu barədə ingilis dilində saxtalaşdırılmış məlumatlar yayırdı, bu məsələyə dair üzdəniraq erməni “tarixçilərinin” ortaya atdıqları qondarma faktları yerləşdirirdilər. Məlumatların inandırıcı olması üçün onlar səhifəyə Naxçıvan Muxtar Respublikası ilə bağlı videosüjetlər də yerləşdirir, guya qədim Azərbaycan diyarının ərazisində ermənilərin tarixi abidələrinin dağıdılması, erməni qəbirlərinin yox edilməsi barədə əsassız informasiyalar paylaşırdılar.

Bununla bağlı sosial şəbəkənin əksər azərbaycanlı istifadəçiləri “Facebook”a səhifənin bağlanması tələbi ilə çoxsaylı şikayət ünvanlasalar da bir nəticə hasil olunmamışdı.

AzərTAc-ın Naxçıvan Muxtar Respublikasındakı bürosu ermənilərin təxribat xarakterli addımlarının qarşısını almaq üçün “Facebook” sosial şəbəkəsinin rəhbərliyinə müraciət ünvanlayıb. Müraciətdə konkret faktlar əsasında bu səhifənin fəaliyyətinin beynəlxalq hüququn normaları ilə daban-dabana ziddiyyət təşkil etdiyi və tarixi saxtalaşdırmaq məqsədi daşıdığı tam dolğunluğu ilə əksini tapıb.

Əvvəlki şikayətlərdən fərqli olaraq bu əsaslandırılmış müraciətə operativ reaksiya verən “Facebook” rəhbərliyi məsələni dərhal araşdırıb və “Nakhichevan belongs to Armenia” səhifəsinin bağlanmasına dair qərar qəbul edib.

Bununla bağlı “Facebook” rəhbərliyinin AzərTAc-ın Naxçıvan Muxtar Respublikasındakı bürosunun rəhbəri Rauf Əliyevə göndərdiyi məktubda deyilir: “Şikayətinizlə əlaqədar “Nakhichevan belongs to Armenia” səhifəsinin saxlanılması barədə əvvəllər qəbul etdiyimiz qərarı dəyişməli olduq. Müraciətiniz əsasında ermənilərin açdıqları səhifə ilə bağlı bütün məsələləri ciddi araşdırdıq və sosial şəbəkə standartlarımızın tələblərini kobud surətdə pozduğuna görə həmin səhifəni ləğv etdik. Haqlı tələbinizə görə təşəkkür edirik”.