Abdulla Şaiq adına Azərbaycan Dövlət Kukla Teatrının aktyoru Rəhim Rəhimovun səhhətində ciddi problemlər yaranıb. Aktyor böyrək çatışmazlığı xəstəliyindən əziyyət çəkir.

“Qafqazinfo” xəbər verir ki, Rəhim Rəhimov “Şərq”ə müsahibəsində səhhəti barədə danışıb.

Böyrəklərində yaranan problemlə bağlı bir müddət əvvəl xəstəxanada müalicə olunub. Həkimlər aktyora böyrək çatışmazlığı diaqnozu qoyublar.

R.Rəhimov bildirib ki, xəstəxanada müalicə almasına baxmayaraq, vəziyyəti yenidən ağırlaşıb:

“Bir müddət vəziyyətim çox pis oldu. Müalicə aldım. Həkimlər deyir ki, mütləq əməliyyat olunmalıyam. Xəstəxanadan çıxdıqdan sonra da müalicəm davam edir. Sonuncu həkim müayinəsi zamanı məlum oldu ki, böyrəklərimin fəaliyyəti 29 faizə düşüb. Bir ay əvvəl bu göstərici 35 faiz idi. Günü-gündən böyrəklərimin fəaliyyəti zəifləyir. Həkimlər deyirlər ki, dializə girmədən təcili böyrək köçürülmə əməliyyatı aparılmalıdır. Bu əməliyyat isə xeyli pul tələb edir”.

Aktyor əməliyyat üçün 15 min manat pul tələb olunduğunu bildirib:

“Əməliyyat üçün 15 min manat pul tələb olunur. Amma mənim donor problemim də var. Qohumlarım, anamgil böyrək köçürülməsi üçün, donor olaraq analizlər veriblər. Görək qohumlarımdan, doğmalarımdan kimin böyrəyi mənim donorum üçün uyğun ola bilər. Böyrək donoru çox bahadı.

Ona görə də yaxınlarımdan uyğun donor olsa, 15 min manat əməliyyat üçün lazım olacaq. Heç bilmirəm necə olacaq. Ailə üzvlərimin hər biri yoxlanılıb. Təəssüf ki, heç biri donor ola bilməz. Təkcə atam böyrəyini mənə verə bilər. O da bir zamanlar ağır xəstəlik keçirib. Ona görə də atamın böyrəyinin mənə köçürülməsi mümkün deyil. Allahın ümidinə qalmışam”.