Nizami Rayon İcra Hakimiyyətinin başçısı Arif Qasımovun sakinlərlə növbəti səyyar qəbul-görüşü keçirilib

“Qafqazinfo” xəbər verir ki, dünən Rayon İcra Hakimiyyətinin başçısı Arif Qasımov tərəfindən Naxçıvanski küçəsi 88, 90, 92 ünvanlarda yaşayan sakinlərlə növbəti səyyar qəbul-görüş keçirilib.

Səyyar qəbulda icra hakimiyyətinin başçısı rayonun sosial-iqtisadi inkişafı, əhalini narahat edən problemlərin həlli istiqamətində həyata keçirilən tədbirlərdən, rayonda aparılan abadlıq və yenidənqurma işlərindən danışıb. A.Qasımov yerlərdə keçirilən bu cür görüşlərin əhalinin qayğı və problemlərinin yerindəcə öyrənilməsi və operativ həllinə geniş imkan yaratdığını söyləyib.

Sonra sakinlər onları narahat edən məsələlərin həlli ilə bağlı Rayon İcra Hakimiyyətinin başçısına müraciət ediblər. R.Zeynalov, B.Balakişiyev, Ə.Ağayev, A.Əlipaşayev, X.Məmmədova, T.Xəlilov məhəllədə uşaqlar üçün əyləncə qurğularının quraşdırılması, ağacların sulanması, iaşə obyektinin kanalizasiya xəttinin binanın kanalizasiya xəttindən ayrılması, liftlərin dəyişdirilməsi və ya əsaslı təmir olunması, zirzəminin çirkab sulardan təmizlənməsi, E.Süleymanov küçəsi boyunca marşrut xəttinin açılması kimi məsələləri diqqətə çatdırıblar.

Qəbulda qaldırılan məsələlər dinlənilərək sakinlərə müvafiq izahatlar verilib, mövcud problemlərin həlli üçün rayon rəhbəri tərəfindən əlaqədar qurum və təşkilatların rəhbərlərinə yerindəcə tapşırıqlar verilib və onların həlli nəzarətə götürülüb.