“AS Group İnvestment” Qurban bayramında 100 şəhid ailəsi ilə görüşdü - Fotolar

“AS Group İnvestment” Qurban bayramında 100 şəhid ailəsi ilə görüşdü
Oxunma sayı: 558

“AS Group Investment” şirkəti özünün Korporativ Sosial Məsuliyyət siyasətinə sadiq qalaraq bu dəfə Qurban bayramında Beyləqan və Cəlilabad rayonlarından olan 100 şəhid ailəsini yad edib.

“Qafqazinfo” xəbər verir ki, şirkət əməkdaşları bayram günlərində Beyləqanın Şahsevən, Mil, Bahar, Kəbirli, Milabad, Bolsulu, Əlinəzərli, Dünyamalılar, Cəlilabadın Göytəpə, Uzuntəpə, Bəciravan, Adnalı, Novruzalılı, Alar, Həziyabad, Günəşli, Gülməmmədli kəndlərində şəhid ailələrilə görüşərək onlara bayram paylarını çatdırıb.     

Ümumiyyətlə sentyabrın 27-dən, ölkəmizin ən şanlı tarixi yazılmağa başladığı gündən “AS Group Investment” ordumuz, vətəndaşlarımız və dövlətimizə dəstək olmağı özünə borc bilir. Şirkət ön cəbhədə döyüşən əsgərlərimizə, ordumuza və müharibə ərzində düşmən zərbələri nəticəsində evləri dağıdılan, başqa kəndlərə, qəsəbələrə yerləşdirilən vətəndaşlarımıza istər ərzaq təchizatı, istərdə də, balansındakı texnikası ilə dəstək olur.

Vətən Müharibəsi qələbə ilə başa çatdıqdan sonra “AS Group Investment” Mingəçevir şəhərində inşa etdiyi, şəhərin ən gözəl tikililərindən sayılan “Park Residence” Yaşayış Binasında qəhrəman şəhid Niyazi İsgəndərovun ailəsinə  3 otaqlı –təmirli və bütün məişət əşyaları ilə təchiz edilmiş mənzil hədiyyə edir.  

Bundan başqa  “AS Group İnvestment” şirkəti Vətən müharibəsində canlarından keçən və yaralanan qəhrəmanlarımızın ailələrinə dəstək olmaq məqsədilə yaradılan “Yaşat Fondu”na 150 min manat, işğaldan azad edilmiş ərazilərimizdə dayanıqlı məskunlaşma üçün müasir və layiqli həyatın təmin edilməsi, bütün sahələrdə quruculuq-bərpa və abadlıq işlərinin aparılması məqsədilə yaradılmış “Qarabağ Dirçəliş Fondu”na isə 300 min manat məbləğində ianə edib.