Avropa Parlamenti plenar sessiyada debatların yekunlarına dair qətnamədə Avropa İttifaqı ölkələrini Çexiyaya dəstək məqsədilə rusiyalı diplomatların koordinasiyalı şəkildə ölkələrdən çıxarılmasına çağırıb. 

Bu barədə “Qafqazinfo” “RİA Novosti”yə istinadən xəbər verir.

“Rusiya: Aleksey Navalnı işi, Ukrayna ilə sərhəddə hərbi gücün artırılması və Çexiyaya hücum” adlı qətnaməni 569 deputat dəstəkləyib, 67-si əleyhinə səs verib, 46-sı isə bitərəf qalıb.

“Avropa Parlamenti Rusiyanın Çexiyaya qarşı təhdidlərini pisləyir, Avropa İttifaqı ölkələrinin müxtəlif hökumətləri, diplomatik xidmətlər tərəfindən artıq qəbul edilmiş həmrəylik qərarlarını dəstəkləyir, “Skripal işi”ndə olduğu kimi, Aİ-yə üzv dövlətləri Rusiya diplomatlarının əlaqələndirilmiş şəkildə göndərilməsini həyata keçirməyə çağırır”, - sənəddə deyilir.

Avropa Parlamentinin beynəlxalq məsələlər üzrə qətnamələri məcburi deyil, deklarativ xarakter daşıyır. Lakin Aİ-nin digər institutları deputatların rəyinə qulaq asmalıdırlar.

Qeyd edək ki, Praqa aprelin ortalarında RF xüsusi xidmətlərini 2014-cü ildə Vrbetitsada yerləşən hərbi sursat anbarının partladılmasında günahlandırıb. Bundan sonra Çexiya Rusiya səfirliyinin 18 diplomatını ölkədən çıxarıb. Cavabında Moskva Çexiya diplomatik missiyasının 20 əməkdaşını arzuolunmaz şəxs elan edib.