Türkiyə Prezidenti yanında Təhlükəsizlik və Xarici Siyasət Şurasının üzvü, Türkiyə-Azərbaycan Dostluq, Əməkdaşlıq və Həmrəylik Fondunun (TADİV) rəhbəri Aygün Attar​ Türkiyənin Cümhuriyyət Xalq Partiyasından olan millət vəkili Aykut Ərdoğdunun Azərbaycan və Türkiyə arasında enerji sahəsində əlaqələr, habelə iki ölkənin dövlət başçılarına qarşı irəli sürdüyü ittihamları pisləyən bəyanatla çıxış edib.

“Qafqazinfo” xəbər verir ki, professor Attar bu barədə öz tviter hesabında yazıb. O, bu ittihamları əsassız adlandıraraq sərt tənqid edib:

“Türkiyə-Azərbaycan Dostluq, Əməkdaşlıq və Həmrəylik Fondu olaraq Aykut Ərdoğdunu Azərbaycana qarşı əsassız iddiaları səbəbindən şiddətlə qınayırıq. Belə həssas dönəmdə “bir millət, iki dövlət” fəlsəfəsinə ciddi zərər vuran ifadələrinə görə üzr istəməsini gözləyirik.

CHP-li millət vəkilinin Türkiyə və Azərbaycan arasındakı təbii qaz anlaşması ilə əlaqədar əsassız iddiaları cahil cəsarətinin təzahürüdür, yoxsa “bir millət, iki dövlət”i həzm edə bilməməsinin göstəricisidir? Milli mücadilə dönəmində evlilik üzüklərini Anadoluya yardım üçün göndərən Azərbaycana bu kinin səbəbi nədir?”

A.Attar “Azərbaycanla bağlı səslənən ittihamlar Azərbaycan Dövlət Fondunun ötən həftə Mərkəzi Bankda bir milyard avro dəyərində hesab açması xəbəri fonunda səsləndirilməsi təsadüfmüdür” deyə sual edib. O, CHP rəhbərliyinə müraciət edərək bildirib ki, Qarabağ savaşı boyunca Türkiyənin Azərbaycanla bağlı nümayiş etdirdiyi həmrəylik onu 1944-cü ildə Boraltan körpüsündə həmin dövrün iqtidarının azərbaycanlı qardaşlara xəyanət edərək SSRİ-yə verməsi və hamısının güllələnməsinin ölkəmizə yaşatdığı utancdan qurtarıb:

“Cənab Kılıcdaroğlu, partiyanızın millət vəkillərinin Azərbaycana yönəlmiş əsassız və ittihamedici iddiaları barədə CHP-dən bir açıqlama veriləcəkmi? Qarabağ müharibəsi günlərində köməkçiniz tərəfindən düşmən tezislərinin təkrar edilməsi, Şuşa Bəyannaməsi TBMM-də müzakirəyə çıxarıldığı zamanda TANAP iftirası nə ilə əlaqədardır?”

Qeyd edək ki, bir müddət əvvəl Azərbaycanın Xarici İşlər Nazirliyi də CHP-dən olan millət vəkili Aykut Ərdoğdunun ittihamedici açıqlamasını şərh etmişdi. Xarici Siyasət İdarəsinin açıqlamasında Azərbaycan ilə qardaş Türkiyə arasında bütün sahələrdə olduğu kimi, enerji sahəsində də açıq, tamamilə şəffaf, qarşılıqlı faydalı əməkdaşlıq münasibətləri mövcud olduğu vurğulanmışdı.

Həmçinin oxuyun: Rəsmi Bakıdan CHP-li deputatın açıqlamasına - Reaksiya