“Azərbaycanda hibrid avtomobillərin ucuzlaşacağı gözlənilir”

“Azərbaycanda hibrid avtomobillərin ucuzlaşacağı gözlənilir”
Oxunma sayı: 2960

Azərbaycanda istehsal ili köhnə olmayan hibrid avtomobillərin qiymətində azalmaların olacağı gözlənilir.

“Qafqazinfo” xəbər verir ki, bu fikirlə iqtisadçı ekspert, deputat Vüqar Bayramov çıxış edib.

O bildirib ki, gələn ildən Vergi Məcəlləsinə ediləcək dəyişikliklərdən biri də istehsal tarixi 3 ildən və mühərrikinin həcmi 2500 kubsantimetrdən çox olmayan hibrid avtomobillərin idxalı və satışının növbəti 3 ildə Əlavə Dəyər Vergisindən (ƏDV) azad edilməsidir:

“Dəyişikliklərə əsasən yalnız elektrik mühərriki ilə işləyən avtomobillərin idxalı və satışı da ƏDV-dən azad ediləcək. Eyni zamanda, elektrik mühərriki ilə işləyən avtomobillər üçün ikinci və üçüncü səviyyə elektrik enerji doldurucularının idxalı da 3 il müddətinə sözügedən vergidən azad olunur”.

Bayramovun sözlərinə görə, sözügedən dəyişikliklərdən sonra istehsal ili köhnə olmayan hibrid avtomobillərin qiymətində azalmaların olacağı gözlənilir:

“Belə ki, ƏDV-dən azad olma onların xərcinin orta hesabla 18 faiz azalmasına səbəb olacaq. Hazırda Yaponiya istehsalı olan hibrid avtomobillərdən daha çox istifadə olunduğunu nəzərə alsaq həmin maşınların qiymətlərində azalmaların olacağı qacılmazdır. Söhbət təbii ki, son 3 ildə istehsal olunan avtomobillərdən gedir. Digər tərəfdən, son dəyişikliklərin qəbul olunması hibrid avtomobillərə də tələbin artmasına gətirib çıxaracaq”.

Deputat bildirib ki, elektrik mühərrikli avtomobillərin də vergidən azad olunması da müsbət haldır: “Bu ölkəmizdə həmin avtomobillərdən istifadəyə marağı artıra bilər”.