Martın 19-dan 23-dək İspaniyada “Fiestalonia” beynəlxalq tətbiqi sənət festivalı keçirilib. Festivalda ölkəmizi “Günxan Art” studiyası təmsil edib.

"Qafqazinfo" xəbər verir ki, festivalda artıq üçüncü dəfədir iştirak edən studiyanın rəhbəri, Azərbaycan Rəssamlar İttifaqının (ARİ) üzvü Günel Hüseynova və yetirmələri (Adil Dəmirtaş, Ləman Kərimli, Leyla Mirməmmədova, Məryəm Cəfərova, Fatimə Əbdülrəhimbəyli, Vəfa Yüzbaşıyeva, Arzu İbrahimbəyova, Firəngiz Tanrıverdiyeva) 12 əsər təqdim ediblər. Təmsilçilərimizin əl işləri 3 birinci yer, üç ikinci yer, kubok və diplomlara layiq görülüb.

Festival təəssüratlarını “Mədəniyyət” qəzeti ilə bölüşən G.Hüseynova bildirib ki, “Fiestalonia” festivalı üç ölkədə - İspaniya, Fransa və İtaliyada keçirilir: “Studiya Fransaya dəvət alsa da, sırf fərdi sərgi üçün İspaniyada keçirilən tədbirə qatıldıq. Qiymətlənirmə isə 3 ölkənin münsifləri tərəfindən həyata keçirildi. İlk dəfə ötən il tədbirə Azərbaycanın incəsənət ustaları ilə birgə qatılsaq da, bu dəfə fərdi şəkildə dəvət aldıq.

Festival çərçivəsində fərdi sərgimiz keçirildi və böyük maraqla qarşılandı. Festival incəsənətin bütün sahələrini əhatə etdiyi üçün rəngarəng xarakter daşıyır. Dünyanın 30-a yaxın ölkəsinin iştirak etdiyi sənət bayramında Azərbaycan tətbiqi sənət nümunələrinin sərgilənməsi milli mədəni irsimizin təbliğinə xidmət edir”.