"Yuventus"un Azәrbaycan Uşaq Futbol düşәrgәsinin açılışında iştirak etmәk üçün Bakıya gәlәn әfsanәvi futbolçu David Trezege ilə bağlı mətbuat konfransı keçirilib.

"Qafqazinfo" xәbәr verir ki, o, mәtbuat konfransında bunları deyib: "Hamını salamlayıram. Bakıda olmaqdan zövq aldım. Bu şәhәrin gözәlliyinә heyran oldum. "Yuventus" olaraq düşünürük ki, Azәrbaycanda da futbolun inkişafı üçün nәsә etmәk lazımdır. Klubumuz bu ölkәyә investisya qoymağı nәzәrә aldı. Buradakı uşaqlara dәstәk olacağıq. Onlar hәm dә zövq alacaqlar. Bu düşәrgә çәrçivәsindә istedadlı gәnclәr üzә çıxa bilәr. "Yuventus"un prezidenti adından Azәrbaycandakı fanatlara tәşәkkür edirәm. Ümid edirәm ki, Bakıya yenә gәlәcәm".

Daha sonra David Trezege jurnalistlərin suallarını cavablandırıb: 

- Çempionlar Liqasında "Bavariya"ya qarş cavab oyunu haqqında nә deyә bilәrsiz?

- "Bavariya" güclü komandadır. Amma qalib gәlә bilәcәyik. İlk oyunda geridә olduğumuz oyunu heç-heçә edә bilmişdik. Sәfәrdә daha yaxşı nәticәyә ümid edirik.

- Bakıda nә diqqәtinizi çәkdi?

- Ümumiyyәtlә, Azәrbaycan haqqında yüksәk fikirdәyәm. Bakı maraqlı şәhәrdir. Azәrbaycanda idmanın vә futbolun inkişafı üçün әla şәrait var. Bunu kluba çatdıracam.

- AFFA Seçki-Hesabat konfransında iştirakınız gözlәnilirdi...

- Mәqsәdimiz buradakı mәtbuat konfransında iştirak etmәk idi vә bura gәldik.

- "Yuventus" İtaliyada uğur qazansa da, Avropada buna nail ola bilmir. Sizcә, niyә bunu bacarmır?

- Bunun ciddi sәbәbi yoxdur. Ümid edirәm ki, bu mövsüm azarkeşlәrimizi sevindirәcәyik.

- 2003-cü ildә Mançesterdә "Milan"a vura bilmәdiyiniz penalti, yoxsa 2006-cı ildә dünya çempionatının finalında vura bilmәdiyiniz penalti daha ağır idi?

- Düzünü desәm, Mançesterdәki daha ağır idi. Amma Almaniyada finalda vura bilmәdiyim dә ağır idi.