Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyev, Milli Məclisin deputatları Rövşən Rzayev və Fərəc Quliyev Avronest Parlament Assambleyasının Sosial komitəsinin iclasında iştirak etmək üçün fevralın 21-dən Ermənistanda səfərdədirlər. “Qafqazinfo” xəbər verir ki, “Avronest”in Sosial Komissiyasının iclasında azərbaycanlı və erməni deputatlar arasında ciddi qarşıdurma yaranıb. Səbəb isə Millət vəkili Azay Quliyevin çıxışı olub. Azay Quliyev çıxışında Ermənistanın Azərbaycan torpaqlarını işğal etdiyini, 1 milyona yaxın qaçqının olduğunu, müharibənin Azərbaycana vurduğu ziyandan, Ermənistanın qeyri-konstruktiv mövqeyindən sərt danışıb. Bu erməni deputatları özündən çıxardıb. Onlar bunu Azərbaycanın təbliğatının növbəti mərhələsi, dəfələrlə eşitdikləri yalan adlandırıblar. Tərəfləri iclasın təşkilatçısının müdaxiləsindən sonra sakitləşdirmək mümkün olub.

Buna baxmayaraq Azay Quliyev xatırladıb ki, Ermənistan işğalçılıq siyasətindən əl çəkərsə Avronestə daxil olan Ermənistanla mədəni-humanitar sahədə əməkdaşlıq etmək mümkündür. Lakin bir daha vurğulanıb ki, bu yalnız işğala son qoyularsa mümkün olar. Deputat Naira Zoqrabyan bu çıxışdan bərk əsəbiləşərək bildirib ki, “görürsünüz, Azərbaycan tərəfi öz fikrindən daşınmır, bir milyon qaçqın, 20% işğal olunmuş ərazi...”

Erməni deputatlar Artak Zakaryan və Ovanes Saakyan azərbaycanlı millət vəkilinin çıxışına həm də ona görə etiraz ediblər ki, Dağlıq Qarabağ konfliktinin həlli ilə ATƏT-in Minsk Qrupu məşğul olub, bu Avronest-in yurisdiksiyasında deyil. Azay Quliyev isə hər vəchlə Dağlıq Qarabağ məsələsini diqqətdə saxlamaqla, təbliğat aparır.

Bir daha xatırladaq ki, hazırda Azərbaycan deputatları İrəvanda səfərdədirlər.