Azərbaycan Kubokunun ¼ final mərhələsinin ilk oyunları çərçivəsində “İnter” doğma meydanında “Rəvan”ı 3-0 hesabı ilə məğlub edib. Sözügedən qarşılaşma Azərbaycan milli komandasının forvardı Vüqar Nadirov üçün əlamətdar olub. Hücumçu “İnter”in heyətində ilk qolunu vurub. Vüqar qarşılaşmadan sonra jurnalistlərə müsahibə verib:

-“İnter”in heyətində ilk qolunu vurdun...

-Uzun müddətdir ki, oynamırdım. Çalışıram ki, oyundan-oyuna əvvəlki formamı bərpa edim.

-Bugünkü oyunla, ilk oyundakı nəticənin təsadüf olduğunu göstərdiniz...

-Təsadüf deməzdim. Ola bilər ki, uşaqlarda yorğunluq var idi. “Rəvan”a yuxarıdan-aşağı baxmırdıq. Bizə bu oyunda vacib qələbə lazım idi.

-Kubokun yarımfinalında sabiq komandanız “Qarabağ”la qarşılaşacaqsınız. Oyun sənin üçün nə qədər əhəmiyyətlidir?

-“Qarabağ”a qarşı oynamaq mənim üçün hər şey deməkdir. Bir ağdamlı kimi “Qarabağ”a qarşı oynamaq mənim üçün çətin olacaq.

-Hər dəfə “Qarabağ” adı eşidəndə sanki acıqlı danışırsan...

-Xeyr, mənim “Qarabağ”la heç bir problemim olmayıb. Qurban Qurbanovla bu günün özündə də münasibətim var. Sadəcə, bir ağdamlı kimi, “Qarabağ”a qarşı oynamaq çətin olacaq.

-Meydanda görünən odur ki, hələ də “İnter”ə uyğunlaşmamısan...

-Yavaş-yavaş olacaq. Birdən-birə Amerika yarana bilməz. İnşallah 4-5 oyundan sonra hər şey qaydasına düşəcək.

-“İnter” üçün kubok, yoxsa çempionat daha önəmlidir?

-“İnter” iki cəbhədə də mübarizə aparır. “İnter” uzun müddətdir kuboku qazana bilmir. Medallar üçün mübarizə aparacağıq.

-“İnter” və “Zirə”nin Avrokuboklara buraxılmaq şansı azdır. Bunu bilə-bilə oyunlara necə motivasiya olursunuz?

-Bu barədə düşünmürük. Meydana çıxdıqda yalnız oyunumuz barədə fikirləşirik. Mənim fikrimcə bu problem həll olunacaq və “İnter” növbəti ildə də Aərbaycanı Avrokuboklarda təmsil edəcək.

-“İnter”ə gəlməklə milli komandaya yolunun kəsildiyini düşünmürsüz?

-“Qəbələ”yə getməmişdən əvvəl “İnter” mənimlə maraqlanırdı. Amma mən “Qəbələ”yə keçməyi üstün tutdum. Buna, səhv addım deməzdim. Sadəcə, qismət bu idi. Buna da şükür.

Elsevər