Bakı Mühəndislik Universitetində (BMU) Xocalı soyqırımının 28-ci ildönümünə həsr olunan anım tədbiri keçirilib. 

“Qafqazinfo”nun məlumatına görə, BMU-nun rektoru, professor Havar Məmmədov çıxışında Xocalı faciəsinin Ermənistanın ölkəmizə qarşı işğalçılıq müharibəsinin gedişində dinc azərbaycanlı əhaliyə qarşı törədilmiş soyqırımı cinayətlərinin ən dəhşətlisi olduğunu vurğulayıb. O bildirib ki, 1992-ci il fevralın 25-dən 26-na keçən gecə Ermənistan silahlı qüvvələri bütün beynəlxalq hüquq normalarını pozaraq, mühasirədəki Xocalı şəhərinin dinc əhalisinin üzərinə ağır hərbi texnika yeridib, onlara misli görünməmiş qəddarlıqla divan tutub, şəhər yerlə-yeksan edilib. Yalnız Azərbaycan xalqına qarşı deyil, bütün bəşəriyyətə qarşı yönəlmiş dəhşətli cinayət əməli nəticəsində 613 nəfər dinc azərbaycanlı milli mənsubiyyətinə görə vəhşicəsinə qətlə yetirilib, onlardan 63-ü uşaq, 106-sı qadın, 70-i qoca olub. Nəticədə 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. Bunlarla yanaşı, 487 dinc sakin ağır yaralanıb, 1275 nəfər girov götürülüb. Girov götürülənlərdən 150 nəfərin taleyi naməlumdur. 

H.Məmmədov 10 gün öncə Almaniyada keçirilən Münhen Təhlükəsizlik Konfransı çərçivəsində Ermənistan-Azərbaycan, Dağlıq Qarabağ münaqişəsi ilə bağlı panel müzakirələrdə Prezident İlham Əliyevin Azərbaycanın ədalətli mövqeyini tarixi faktlarla bir daha dünya ictimaiyyətinə çatdırdığını vurğulayıb. O bildirib ki, Prezident tutarlı, tarixi, rəsmi sənədlərlə Ermənistanın işğalçılıq siyasətini, Dağlıq Qarabağ regionunun əzəli Azərbaycan torpağı olduğunu dünya ictimaiyyətinə göstərib. Azərbaycanın dövlət başçısının qarşısında aciz duruma düşən Paşinyan isə dünya ictimaiyyətinin gözü önündə savadsızlığını, həm tarixi, həm də müasir siyasəti anlamadığını nümayiş etdirib. 

Sonda tələbələrin ifasında “Xocalı harayı” adlı ədəbi-bədii kompozisiya nümayiş olunub.