“Sumqayıt Regional Perinatal Mərkəzi regional olaraq 3-cü səviyyəli doğuşayardım xidməti göstərir. Mərkəzdə neonatal reanimasiya və intensiv terapiya, neonatal cərrahi laporoskopik ginekoloji əməliyyatlar həyata keçirilir”.

“Qafqazinfo” xəbər verir ki, bunu jurnalistlərə açıqlamasında Sumqayıt Tibb Mərkəzinin direktor müavini, Perinatal Mərkəzin rəhbəri Təranə Rəcəbli deyib.

O bildirib ki, Mərkəzdə 7/24 4-cü səviyyəli laborator və təcili tibbi yardım xidməti fəaliyyət göstərir: “Mərkəzdə perinatal və neonatal skrininq edilir. Katamnestik izləm kabinetimizdə xəstə və vaxtından əvvəl doğulmuş uşaqların sağlamlığı nəzarətdə saxlanılır. 2024-cü ilin yanvar-may aylarında 1641 katamnestik gəliş olub. Region üzrə yenidoğulmuşların ROP müayinəsini edirik. Bu rəqəm isə 257-dir”.

O, göstərilən xidmətlərlə bağlı bəzi göstəriciləri də diqqətə çatdırıb: “Perinatal Mərkəzdə bu ilin ilk 5 ayı ərzində 610 doğuş qeydə alınıb. 2023-cü ilin sentyabrından bu günədək 22 neonatal cərrahi əməliyyat həyata keçirilib. Bu ilin ilk 5 ayında mərkəzimizə 64 hamilə təxliyə edilib. Bununla yanaşı 611 audiometriya icra edilib, 799 topuq testi götürülüb”.

Direktor müavini qeyd edib ki, qadınların reproduktiv orqanlarının xərçəngönü xəstəliklərini aşkarlamaq məqsədilə kolposkopik müayinə və PAP smear testləri edilir: “Bu ilin ilk 5 ayında 198 kolposkopik müayinə həyata keçirilib. Bu, icbari tibbi sığortanın uğurlu tətbiqi, sağlamlıq sahəsində sosial bərabərliyi və iqtisadi dayanıqlığı təmin etmək baxımından mühüm əhəmiyyət kəsb edir”.

Gülnar Əliyeva