Bu gün Bakı Ağır Cinayətlər Məhkəməsində Mənimsəmədə təqsirləndirilən "Çudo Peçka"nın sahibi Çingiz Cəlilovun məhkəməsi keçirilib. 

"Qafqazinfo"nun verdiyi xəbərə görə, hakim Əhməd Quliyevin icraatında olan prosesdə Ç.Cəlilovun vəkili Janna Bağırova vəsatət verərək Məhkəmə Mühasibatlıq Ekspertizasının ekspertinin  dindirilməsini və Əmanətlərin Siğortalanması Fonduna sorğu göndərilməsini istəyib: "2008-ci ildən sonra "Bank Standard"dan Ç.Cəlilova nə qədər kredit verilib? Həmçinin bankda mənimsəmə nə vaxtdan başlanılıb? Xahiş edirik ki, Əmanətlərin Siğortalanması Fondu bizim iki sualımıza cavab versin".

Vəsatət təmin edilib.

Proses mayın 17-də davam etdiriləcək. 

Qeyd edək ki, “Çudo Peçka” və “ÇP Aqro” MMC-lərinin təsisçisi Cəlilov Çingiz Asim oğlu “Bank Standard” QSC Kommersiya Bankının İdarə Heyətinin sədri olmuş Kriman Səlim Eldaroviçlə qabaqcadan razılaşmaqla əlbir olaraq 21 milyon 874 min manat məbləğində krediti bankın Müşahidə Şurasının razılığı olmadan dəyəri süni olaraq artıq qiymətləndirilmiş əmlakları girov qoymaqla özünün, yaxın qohumlarının və qohumluq münasibətində olduğu, eləcə də rəhbərlik etdiyi cəmiyyətlərdə işləyən ayrı-ayrı şəxslərin adlarına guya bağ evinin alınması, mənzil təmiri, torpaq alınması və bu kimi digər təyinatlarla rəsmiləşdiriblər.

Daha sonra qeyd olunan kredit müqavilələri əsasında banka guya külli miqdarda kredit borcu olduğu görüntüsünü yaradaraq bir neçə dəfə restrukturizasiya etdirməklə mənimsədiyi 13 milyon 962 min manat pul vəsaitini Səlim Krimanla öz aralarında bölüblər. 

Murad Əhməd