Aprelin 26-27-də Bakıda keçirilən BMT Sivilizasiyalar Alyansının VII Qlobal Forumunda iştirak edən Türkiyə prezidenti Rəcəb Tayyib Ərdoğanın tədbirdəki çıxışının Azərbaycanın rəsmi mətbuatında ixtisar edildiyi barədə xəbərlər yayılıb. Sosial şəbəkələrdə bir sıra istifadəçilər qeyd ediblər ki, Ərdoğanın Bakıda nitqində Rusiya prezidenti Vladimir Putinə qarşı sərt fikirləri, Putini cinayətkar Bəşər Əsədi Moskvada qırmızı xalça üzərində qarşılamaqda ittiham eləyən ifadələri Azərbaycanın rəsmi dövlət qəzetlərində dərc edilməyib.

“Qafqazinfo” musavat.com-a istinadən xəbər verir ki, məsələ ilə bağlı rəsmi dövlət qəzeti “Azərbaycan”ın baş redaktoru, deputat Bəxtiyar Sadıqov Türkiyə prezidentinin qeyd edildiyi şəkildə çıxışını eşitmədiyini bildirib:

“Bu tipli fikirlər sosial şəbəkələrdə bəziləri tərəfindən yerləşdirilib ki, guya, cənab Ərdoğanın çıxışı ixtisar edilib. Sosial şəbəkələri bir çox hallarda ciddiyə almaq lazım deyil. Kimin ağlı necə kəsirsə, kim nəyi necə təhlil edə bilirsə, sərbəst şəkildə sosial şəbəkədə yazır. Burada heç bir qadağa yoxdur. O insanlar özləri iştirak etmədikləri tədbirdən, şəxsən eşitmədikləri nitqi təhlil edirlər. Ərdoğanın nəyi necə dediyini dəqiq bilmədən bu barədə müzakirə açırlarsa, bunu doğrudan da ciddiyə qəbul eləmək lazım deyil”.

Baş redaktor qeyd edib ki, Azərbaycan prezidenti də daxil olmaqla, prezidentlərin iştirak etdiyi o cür tədbirlərdən materialları “Azərbaycan” qəzetinə AzərTAc-Dövlət İnformasiya Agentliyi göndərir. Bu agentliyin müxbirlər qrupu tədbirdən material işləyib hazırlayır və onların hazırladıqları materialı olduğu kimi qəzetdə dərc edilir:

“Yəni biz AzərTAc-dan göndərilən materialların üzərində işləmirik, onu ixtisar etmirik. Konkret olaraq BMT-nin Sivilizasiyalar Alyansının 7-ci Qlobal Forumu və Ərdoğanın çıxışı ilə bağlı da AzərTAc-dan bizə nə gəlibsə, biz də onu dərc etmişik. Biz dünya dağılsa da o materialı ixtisar etmərik.

BMT-nin Sivilizasiyalar Alyansının 7-ci Qlobal Forumu kimi böyük əhəmiyyət daşıyan bir beynəlxalq tədbir Azərbaycanda keçirilir və BMT-nin tribunası Azərbaycanda qurulur. Bu barədə yazmaq lazımdır. Ərdoğanın və ya baş bir mötəbər iştirakçının çıxışının bütöv dərc edilib-edilməməsi kimi məsələlərdən yazmaqdansa, bu forumun Azərbaycan və dünya üçün əhəmiyyətindən yazmaq daha düzgün yanaşma olardı.

Digər tərəfdən də unutmaq lazım deyil ki, Türkiyə Azərbaycanın böyük dostudur, qardaşıdır. Rusiyanı da dost ölkə sayırıq. Bu gün bu iki dövlət arasında ziddiyyət yaranıb. Biz Türkiyə ilə Rusiya arasında ziddiyyətlərin dərinləşməsini yox, münasibətlərin normallaşmasını istəyirik. Ona görə də ziddiyyətləri dərinləşdirə bilən davranışlara yol vermirik”.

B.Sadıqov vurğulayıb ki, Türkiyə ilə Azərbaycanın münasibətlərinin yaxşılaşması, əməkdaşlıq səviyyəsinə qayıtması Azərbaycanın da maraqlarına uyğundur. Qarşıdurma Azərbaycana da xeyir gətirməz: “Türkiyə ilə Rusiyanın münasibətlərinin daha da gərginləşməsi istiqamətində qızışdırıcı davranışa Azərbaycan heç vaxt yol verməyib və verməz. Çünki vəziyyətin kəskinləşməsindən Azərbaycan da zərər görə bilər. Dövlətin, xalqın maraqlarını nəzərə almaq, öndə tutmaq lazımdır”.