Ərdoğanla Conson ikitərəfli münasibətləri müzakirə edib

erdoganla-conson-ikiterefli-munasibetleri-muzakire-edib
Oxunma sayı: 1408

Türkiyə Prezidenti Rəcəb Tayyib Ərdoğanla Böyük Britaniya Baş naziri Boris Conson arasında telefon danışığı olub.

Bu barədə “Qafqazinfo” “Anadolu” agentliyinə istinadən xəbər verir. 

Ticarət, turizm, müdafiə, kənd təsərrüfatı, COVID-19 pandemiyası ilə mübarizə, ikitərəfli münasibətlərin yaxşılaşdırılması istiqamətində atılan addımlar və regional mövzular müzakirə olunub.

Prezident Ərdoğan bildirib ki, pandemiya ilə bağlı vəziyyət imkan verərsə, Türkiyə bu ilin ikinci yarısında “Tatlıdil” adlı Türkiyə-Britaniya Forumunu qəbul etməyə hazırdır.

Dövlət başçısı Türkiyəyə aprel ayında maneəsiz və təhlükəsiz turist səfərlərinin bərpa olunacağına əminliyini ifadə edib.

Türkiyə lideri Böyük Britaniya ilə Türkiyə arasında sərbəst ticarət sazişinin onların münasibətlərdə dönüş nöqtəsi olduğunu bildirib. Ərdoğan vurğulayıb ki, atılan addımlar ikitərəfli ticarətin həcminin 20 milyard dollara çatmasına kömək edəcək.

Prezident qeyd edib ki, Ankara Londonun Kipr məsələsi ilə bağlı səylərini alqışlayır.