Ərəblər millimizin futbolçusunu belə aldadıb - Foto

erebler-millimizin-futbolcusunu-bele-aldadib
Oxunma sayı: 4363

“Sabah”dan ayrılaraq “Əl-Əyn” klubuna keçməyə hazırlaşan Bəhlul Mustafazadə transferindən son anda imtina edən BƏƏ təmsilçisinin bu addımına münasibət bildirib.

“Qafqazinfo” xəbər verir ki, Azərbaycan millisinin üzvü İnstaqram hesabında ərəblərin onu aldatdığını, buna görə FİFA-ya şikayət edəcəyini bildirib:

"Böyük məyusluqla qeyd etməliyəm ki, "Əl-Əyn" klubu mənə göndərdiyi məktubla transferdən imtina etdiklərini bildirib. İyunun əvvəlində "Əl-Əyn"lə iyulun 1-dən qüvvəyə minəcək razılaşma imzalamışdıq. Razılaşmaya əsasən, Əbu-Dabiyə gedib tibbi yoxlanışdan keçməli idim.

Amma müqavilənin başlama vaxtının yaxınlaşmasına baxmayaraq, klub tərəfindən heç bir əlaqə saxlanılmırdı. Təmsilçilərimin müraciətləri zamanı isə "Əl-Əyn" mənim viza və tibbi baxış ilə əlaqəli məsələlərimi həll etməyi hər dəfə müxtəlif daxili problemlərə əsaslanaraq uzadırdı. Doğrusu, yaranmış vəziyyətin səbəbini anlaya bilmirdim. Əgər klub fikrini dəyişibsə, bunu mənə açıqca bildirməli, qəribə bəhanələrlə vaxtı uzatmamalı idi. Yaranmış vəziyyətin nəticəsində mən mövsümöncəsi hazırlıq dövrünü keçə bilmədim, üstəlik, qısa zaman ərzində yeni komanda tapmaq məcburiyyətində idim. "Əl-Əyn"in məsuliyyətsiz davranışları ilə əlaqədar hüquqi şəxslərlə məsləhətləşdim və qanunlara əsasən aydın oldu ki, imzalanmış ilkin müqavilə hüquqi qüvvəyə malikdir. "Əl-Əyn" tibbi yoxlanışdan keçməməyi əsas gətirib, bu müqaviləni ləğv edə bilməz, çünki yoxlanışı təşkil etmək klubun öhdəliyində idi və bizim çoxsaylı müraciətlərimizə baxmayaraq, bunu həyata keçirmədilər. Ümid edirəm ki, həyatımda ilk və son dəfə belə bir vəziyyətlə qarşılaşdım.

"Əl-Əyn"in hərəkətləri FIFA reqlamentinə ziddir və ədaləti bərpa etmək üçün sona qədər haqqımı müdafiə edəcəm. Ən qısa zamanda FIFA-ya şikayət edərək, karyerama vurulan zərərə görə ən sərt cəzaların verilməsini tələb edəcəm. Yaranmış vəziyyətə aydınlıq gətirməyi özümə borc bildim və bir daha bu xoşagəlməz mövzuya qayıdılmasını istəməzdim".