Gürcüstanda din xadimləri ölkənin ən iri "Tbilisi JAM! Fest" beynəlxalq musiqi festivalına qarşı çıxıblar.

“Qafqazinfo”nun Ans press-ə istinadən məlumatına görə, 4-5 iyun tarixlərində keçirilməsi nəzərdə tutulan festival çərçivəsində baş tutan səs-küylü şou yaxınlıqda yerləşən monastırın din xadimlərinin xoşuna gəlməyib.

Din xadimləri və bir sıra şəhər sakini festivalın keçirildiyi əraziyə gələrək, musiqinin yaxınlıqda yerləşən qəbirstanlıq və monastırda eşidildiyi ilə bağlı şikayət ediblər. Bu zaman festival meydançasına elektrik enerjisinin verilməsi dayandırılıb. İştirakçıların fikrincə işığı din xadimləri söndürüblər.

Festival təşkilatçılarının birinin yerli KİV-ə verdiyi məlumata görə, insidentlə bağlı rəsmi məlumat yaxın zamanda veriləcək. "Xoşagəlməz və utancverici hadisə baş verib. Bəli, festival demək olar ki, din xadimləri tərəfindən təxirə salınıb" - deyə təşkilatçıların nümayəndəsi bildirib.

Şahidlərin sözlərinə görə, əraziyə gələn polislər iştirakçıları festival ərazisini tərk etməyə vadar edib. Həmin zaman çıxış edən "Jinjer" qrupunun üzvləri öz rəsmi Facebook səhifələrində yazıblar ki, "sivil görünən ölkədə dinin qanundan daha üstün olduğundan" məyus olublar. Qrup həmçinin yaxın zamanda festivalın keçirilməsi üçün uyğun bir yerin tapılacağına və onların gürcüstanlı tamaşaçılar qarşısında çıxış edə biləcəyinə ümid etdiyini bildirib.