21 saylı Nəsimi-Binəqədi seçki dairəsindən namizəd, Müsavat Partiyasının üzvü Gülağa Aslanlı seçki məntəqələrində qanun pozuntularının olması ilə bağlı MSK-ya müraciət edib.

“Qafqazinfo” xəbər verir ki, bu barədə Komissiyanın bu gün keçirilən iclasında MSK-nın ekspert qrupunun üzvü İlkin Şahbazov məlumat verib.

G.Aslanlı müraciətə 26 məntəqəyə dair videogörüntülər əlavə edib. Araşdırma zamanı videogörüntülərə baxış keçirilib və seçicilərin iradəsinə müdaxilə ilə bağlı qayda pozuntusu müəyyən olunmayıb.

Həmçinin müraciətdə iddia olunur ki, 37 seçki məntəqəsinin üzvləri həmin məntəqələr üzrə yaşamır.

Qeyd olunur ki, bir sıra ünvanlarda yerləşən məntəqələr 21 saylı Nəsimi-Binəqədi seçki dairəsinin yox, 22 saylı Nəsimi-Yasamal seçki dairəsinin hüdudlarına aiddir. Lakin seçki dairələrinə məxsus olan məntəqələrin ünvanları MSK-nın rəsmi saytında da qeyd olunub. Bu isə o deməkdir ki, iddia əsassızdır.

Şikayətçinin müraciəti əsasında 30 saylı seçki məntəqəsində doğrudan da qayda pozuntularının olması müəyyən edildiyi üçün isə sözügedən məntəqənin səsvermə nəticələri ləğv olunub. Beləliklə, Gülağa Aslanlının müraciəti qismən təmin edilib.

Təklif səsə qoyularaq qəbul edilib.

***

86 saylı Ağcəbədi seçki dairəsindən namizəd Sabir Hacıbəyli də seçki məntəqələrində qanun pozuntularının olması ilə bağlı MSK-ya müraciət edib.

Müraciətçi seçki məntəqələrində qanun pozuntularının olmasını iddia edib və səsvermə nəticələrinin ləğvini tələb edib.

Dairə seçki komissiyası əsaslandırıb ki, araşdırma zamanı müraciət təsdiqini tam tapmayıb. Müraciətə əlavə olunan 1 ədəd elektron materiala baxış keçirilib və 7 saylı seçki məntəqə istisna olmaqla, digər məntəqələrlə bağlı iddialar təsdiqlənməyib.

7 saylı seçki məntəqəsində isə pozuntular aşkarlandığından, dairə seçki komissiyası tərəfindən müraciət qismən təmin edilib və sözügedən məntəqədə səsvermə nəticələri etibarsız sayılıb.

Təklif səsə qoyularaq qəbul edilib.

Nuranə Daxilqızı