“Qəbələ”nin kapitanı Cavid Hüseynov Avropa Liqasının II təsnifat mərhələsində Polşanın “Yagelloniya” klubu ilə Bakıda keçirilən oyundan (1:1) sonra müsahibə verib.

“Qafqazinfo” xəbər verir ki, o, brifinqdə jurnalistlərin suallarını cavablandırıb.

- Sanki komandanız oyuna hazır deyildi. Bəs necə düşünürsən?

 - İlk oyunumuz idi. Komandaya yeni gələn futbolçuların uyğunlaşma problemi var. Xəttlər arasında əlaqə zəif idi. Bundan başqa, ikinci hissədə çox top itkilərinə yol verdik. Belə komandalarla oyunda isə top itirmək olmaz. Polşalılar əks-hücumda yaxşı oynayır. Onların da qol vəziyyətləri çox oldu. Çünki bizim başımız ikinci qolu vurmağa qarışmışdı. Belə olan halda da boşluqlar buraxırdıq. "Yagelloniya" güclü komandadı. İstəmirdik ki, belə nəticə olsun. Qələbə qazanmaq istəyirdik, amma alınmadı. Cavab oyununda qələbə qazanmağa çalışacağıq.

- Rəqibin futbolçuları ucaboylu idi. Buna görə də hava toplarından çox istifadə edirdilər. "18 nömrə"li futbolçu da yaxşı top saxlayırdı. Belə komandalarla oyunlarda qələbə qazanmaq üçün necə oynamaq lazımdı?

- Biz ən doğru variantı seçmişdik. Müdafiəmiz dediyiniz futbolçuya qarşı heç də zəif oynamadı. Sadəcə. hücumda istədiyimiz kimi oynaya bilmədik. Tez-tez top itirirdik. Biz top itirəndə də rəqib əks hücuma keçirdi.

 - "Yagelloniya"dan belə oyun gözləyirdiz?

- Bəli. Amma özümüzdən ilk hissədə belə zəif oyun gözləmirdik. Qol buraxandan sonra məyus olduq, toparlana bilmədik. Amma ikinci hissəyə yaxşı başladıq. Top itkilərinə az yol versəydik, hər şey başqa cür olardı.

- Mərhələ adlamaq şansını necə dəyərləndirirsən?

- Şanslar bərabərdi. Ruhdan düşmək olmaz. Düşünürəm ki, yaxşı olacaq.

- Uzun fasilədən sonra avrokubok matçında oynadın. hansı hissləri yaşadın?

- Əvvəlki hisslər yenə qayıtmışdı. O həyəcanı yaşayırdım. Sevinirəm ki, yenə bu həyəcan qayıtdı.

 - Hakimin idarəçiliyi ilə bağlı nə deyə bilərsən?

- Özünüz də hakimliyi gördünüz. İlk yarıda hər şey yaxşı idi. Amma ikinci hissədə hakim bizi çox sıxdı. Sanki biz qonaq komandayıq, "Yagelloniya" meydan sahibi. Narazılıq edəndə sarı vərəqə verirdi. Belə vəziyyətlərdə hakimə təzyiq etməliyəm. Bu normaldır. Yersiz qayda pozuntuları verir, penaltimizi vermir. Epizodun təkrarına baxacağıq. Amma mənə elə gəlirdi ki, bir epizodda rəqibin qapısına penalti verməlidi idi.  Hara gedirik, bizi sıxırlar. Evdə oynayanda da yenə bizə qarşı bu cür münasibət olur.

 - Öz oyunun haqda hansı fikirdəsən? Əvvəlki Cavid Hüseynov geri qayıdıb?

- Bunu sizslər deyə bilərsiniz. Öz oyunuma yaxşı deməzdim. Oyunum normal alındı. İkinci hissədə biz üstünlük əldə etmişdik. Rəqibin baş məşqçisi bunu hiss etdi və taktiki dəyişiklik etdi. Oyunçu dəyişiklikləri də öz sözünü dedi.