Sabah Azərbaycan Kubokunun finalında “Qarabağ”la qarşılaşacaq “Qəbələ”nin baş məşqçisi Roman Qriqorçukun “Qafqazinfo”ya müsahibəsi

-    Final matçına komandanız tam hazırdır?

-    Heyət tam olaraq hazırdır. Çalışırıq ki, əhvalımızı yaxşı tutaq. Psixoloji olaraq da hər şey yolundadır. Çünki bu matç bizim üçün vacibdir. 

-    Premyer Liqada birinciliyi “Qarabağ” qazandı. Kubokda qalib gəlməklə çempionluq üzüntüsünü unutdurmağı düşünürsünüz? 

-    Heç bir kubok çempion olmağın yerini verə bilməz. Uuzn marafonda birincilik istənilən kubokdan üstündür. Buna baxmayaraq biz istəyirik ki, Azərbaycan kubokunu qazanaq. Əhəmiyyətsiz saymaq istəmirik. Meydanda əlimizdən gələni edəcəyik. 

-    “Qəbələ” ilə Avropa Liqasında tarix yazmısız. Daxili turnirlərdə də bu klubun tarixinə düşmək bu matçın önəmini sizin üçün daha da artırır?

-    Daxili çempionatda da pis oynamamışıq. Deməzdim ki, heç nə əldə etmədik. Elə gümüş medallar da “Qəbələ” üçün tarixi nəticə idi. Digər tərəfdən bütün matçlar, bütün kuboklar önəmlidir. Ayıra bilmərik.

-    Heyət baxımından çətinlikləriniz var?

-    Heyətdə heç bir çətinlik yoxdur. Hamımız oyuna köklənmişik. Bütün fikirləri başımızdan atıb sadəcə finalı düşünürük. İstəyirik ki, tam şəkildə motivasiya olub kuboku “Qəbələ”yə gətirək. 

-    Daniel Subotiçin oynamayacağı deyilir...

-    Düzdür, Daniel Subotiç zədəlidir. Vitali Vernidub da matçda olmayacaq. Amma bütün bunlar əhval-ruhiyyəmizi pozmamalıdır. 

-    Stadionla tanış olmusunuz. Ot örtüyü öz oyununuzu göstərməyə nə dərəcədə mane olacaq?

-    Stadionla tanış olmamışam. Çünki indi məşq edəcəyik. Hazırda buradayam. 

-    Heyətdən gedəcək futbolçuları müəyyənləşdirmisiniz, yoxsa finalı gözləyirsiz?

-    Hər şeyə finadan sonra aydınlıq gələcək. Çünki bu dəqiqəəsas hədəf kuboku qazanmaqdır. Finaldan sonra bunlar barədə qərar verəcəyik. 

-    Teo Uiksin artıq “Qəbələ”dən gedəcəyi deyilir. Bu tam dəqiqləşib?

-    Yox, doğru deyil. Onun haqqında da qərarı sonra verəcəyik. 

-    Bezotosnı ilə yeni müqavilə bağladığınız doğrudur? Çünki Ukrayna mətbuatı bunu yazıb...

-    Yox, onunla heç bir müqavilə imzalamamışıq. Çünki heyətlə bağlı qərarları sonra verəcəm.