Binəqədi Rayon İcra Hakimiyyəti başçısının 2019-cu ildəki fəaliyyətinə və 2020-ci ildə qarşıda duran vəzifələrə həsr olunmuş hesabat yığıncağı keçirilib.

“Qafqazinfo” xəbər verir ki, tədbirdə Binəqədi Rayon İcra Hakimiyyətinin başçısı Elxan Allahverdiyev, Prezident Administrasiyasının Ərazi–təşkilat məsələləri şöbəsinin 1-ci ərazi sektorunun müdiri Tağı Tağıyev, Rayon İcra Hakimiyyəti başçısının müavinləri, Yeni Azərbaycan Partiyası Binəqədi Rayon Təşkilatının sədri Ramiz Göyüşov, RİH başçısı Aparatının məsul işçiləri, rayonun hüquq mühafizə orqanları, icra strukturlarının rəhbərləri və rayon ictimaiyyəti nümayəndələri iştirak ediblər.

Tədbir iştirakçıları ilk öncə Ulu Öndər Heydər Əliyevin Yeni Azərbaycan Partiyası Binəqədi Rayon Təşkilatının inzibati binası qarşısında ucaldılmış abidəsi önünə gül dəstələri düzərək, dahi şəxsiyyətin ruhuna öz ehtiramlarını bildirdilər.

Hesabat yığıncağı Prezident İlham Əliyevin ötən il rayona etdiyi səfərlər, rayonda həyata keçirilən abadlıq-quruculuq işləri, əldə olunan nailiyyətlər, Binəqədi Rayon İcra Hakimiyyətinin illik fəaliyyətindən bəhs edən filmin nümayişi ilə başlayıb.

Elxan Allahverdiyev Şura iclasını açaraq, iclasın gündəliyini elan edib.

2019-cu ildəki fəaliyyətinə dair hesabat məruzəsi ilə çıxış edən E.Allahverdiyev “Nəsimi ili” kimi qeyd edilən 2019-cu ili uğurlu bir il kimi səciyyələndirərək ölkə Prezidentinin siyasi iradəsi sayəsində Azərbaycanın uğurla, sürətlə inkişaf etdiyini, qarşıya qoyulan bütün vəzifələrin icra olunduğunu, ölkəmizin hərtərəfli dinamik inkişafının təmin edildiyini bildirib.

RİH başçısı həmçinin, Binəqədi rayonunun sosial-iqtisadi həyatında da 2019-cu il ərzində görülən işlərin yekunu olaraq bir sıra nəticələrin əldə olunduğunu bildirib.

Daha sonra hesabat yığıncağında RİH başçısının müavini Aygün Əliyeva ölkədə könüllülər üçün yaradılmış şərait və əldə olunan nailliyyətlər barədə, Binəqədi qəsəbə bələdiyyəsinin sədr müavini Niyaz Niftiyev və “Akabe” MMC-nin direktoru Səməd Hacıyev hesabat məruzələri ilə çıxış etdilər.

Tağı Tağıyev Azərbaycan Respublikasının 2019-cu ildəki sosial-iqtisadi inkişafının nəticələri, Prezident İlham Əliyevin rəhbərliyi ilə ölkədə gedən hərtərəfli və sürətli tərəqqidən danışaraq çıxışlara yekun vurub.

Şura iclasının qərar layihəsinin oxunmasından sonra Binəqədi rayonunun sosial-iqtisadi, ictimai-siyasi və mədəni inkişafında fəal iştirakına görə bir qrup şəxsin mükafatlandırma mərasimi oldu.

Sonra Prezident İlham Əliyevə yığıncaq iştirakçıları adından müraciət oxunub.