Xətai rayonu, Həsən Salmani küçəsi, bina 15-də yaşayan altı ailə hər gün böyük təhlükə altında yaşadıqlarını bildirir. Bununla bağlı “Qafqazinfo”ya müraciət edən sakinlərin sözlərinə görə, yaşadıqları bina qəzalı vəziyyətdədir və burada yaşamaq çox risklidir: 

“1912-ci ildən istismara verilən binadır. 3-cü blokun vəziyyəti gün-gündən daha da pisləşir. Bir müddət əvvəl qonşuların bir neçəsi köçürüldü. Bütün qışı binanın hissə-hissə qırılıb töküldüyünün şahidi olduq. İki il bundan qabaq 2-ci mərtəbədə yaşayan qonşunun döşəməsi qırıldı, qadın 1-ci mərtəbədə yaşayan qonşunun evinə yıxıldı. Bir ay Musa Nağıyev adına 1 saylı xəstəxanada ağır vəziyyətdə yatdı.  FHN-in bir qrup əməkdaşı o zaman gəlib binanı yoxladı. Bizə dedilər ki, qaçın, canınızı qurtarın. Amma bizim də müraciət etmədiyimiz qurum qalmayıb. Hər gün risk altında olmağımıza baxmayaraq taleyimizlə maraqlanan yoxdur. Hara gediriksə də bizi Xətai rayon İcra Hakimiyyətinə yönləndirirlər.  İcra da 2 ildir ki, bizim köçürülmə məsələmizi həll etmir”.

***

“Qafqazinfo” məsələylə bağlı Xətai rayon İcra Hakimiyyətinin İctimai-siyasi və humanitar məsələlər şöbəsinin müdiri Pənah İmanovla əlaqə saxlayıb. P.İmanov problemdən xəbərdar olduqlarını bildirib: “Hazırda Xətai rayonu ərazisində 99 qəzalı vəziyyətdə bina var və bu bina da həmin siyahıya daxildir. Binada mənzilləri çox pis gündə olan 2 ailə artıq iki ildən çoxdur ki, kirayə mənzillərə çıxarılıb və İcra Hakimiyyəti tərəfindən kirayə haqları ödənilir. Həmin bina, hətta orada yaşayan insanlar da bizim nəzarətimizdədir. Əlaqədar təşkilatlara müraciətlər edilib, cavab gözlənilir. Göstəriş nə formada olacaqsa, biz onu icra edəcəyik. Gələcəkdə sökülməsi gözlənilir”.

Günel Türksoy