İnadkar gürcü jurnalist Lavrovla rusca danışmaqdan imtina etdi - Video

İnadkar gürcü jurnalist Lavrovla rusca danışmaqdan imtina etdi
Oxunma sayı: 4441

Rusiyanın xarici işlər naziri Sergey Lavrovla Gürcüstanın “Rustavi-2” telekanalının jurnalisti Tamara Nutsubidze arasında maraqlı dialoq yaşanıb.

“Qafqazinfo” xəbər verir ki, hadisə Stokholmda keçirilən mətbuat konfransında baş verib.

Tamara Nutsubidze Rusiya xarici işlər nazirinə ingilis dilində sual verib. Rusiya XİN-in sözçüsü Mariya Zaxarova jurnalistdən rus dilində sual verməsini xahiş edib. Gürcü jurnalist isə bununla razılaşmayıb.

“Rustavi-2” telekanalının əməkdaşı ingilis dilinin problem olub-olmadığını soruşub. S.Lavrov da gülümsəyərək, ondan rus dilinin onun üçün problem olub-olmadığını soruşub.

"Bu sizin üçün problemdir?", - Sergey Lavrov soruşub. Gürcü jurnalist yenə də rus dilində danışmaqdan imtina edərək sualı ingilis dilində verib.

Nəticədə, gürcü jurnalistin ingilis dilində verdiyi suala S.Lavrov rusca cavab verib.