“Kristal Abşeron”dan və şəhid ailəsindən ev məsələsi ilə bağlı - Açıqlama

“Kristal Abşeron”dan və şəhid ailəsindən ev məsələsi ilə bağlı
Oxunma sayı: 3217

“Kristal Abşeron” şirkəti Vətən müharibəsi şəhidi Teymur Əzizovun ailəsinin mənzil borcuna güzəşt edilməməsi ilə bağlı yayılan iddialara aydınlıq gətirib.

Şirkətdən “Qafqazinfo”ya verilən məlumata görə, şəhid Teymur Əzizovun anası Əzizova Lyubov Vyaçeslavovnanın “Kristal Abşeron” MTK-dan alınmış daşınmaz əmlaklar üzrə borclarının ödənilməsində yaranmış problemlərlə bağlı yayımlanan məlumatlar həqiqətə uyğun deyil:

“Belə ki, T. Əzizov “Kristal Abşeron”dan ümumilikdə 4 mənzil, 2 qeyri-yaşayış (ticarət) sahəsi və 2 avtodayanacaq alıb. Lakin artıq 2 ilə yaxındır ki, ödənişlərində gecikmələr yaranıb. Hazırda 4 mənzil üzrə qalıq borc ümumilikdə 100 min 37 manat təşkil edir. T. Əzizov İkinci Qarabağ müharibəsində şəhid olduqdan sonra “Kristal Abşeron” MTK-nın təsisçiləri onun varisi – həyat yoldaşı Səmədova Zeynəb Vəli qızına dəfələrlə 2 mənzil üzrə olan 50 min 18 manat məbləğində borcun təsisçilər tərəfindən ödənilməsini təklif ediblər. Lakin o, bununla razılaşmayıb”.

Şirkətdən həmçinin bildirilib ki, “Kristal Abşeron” MTK 44 günlük Vətən müharibəsi ərzində və ondan sonrakı dövrdə Silahlı Qüvvələrə Yardım Fonduna 200 min manat, “YAŞAT” Fonduna 100 min manat ödəyib, həmçinin silahlı qüvvələrimizə zəruri yük avtomobilləri və müxtəlif növ tikinti texnikası ilə dəstək olub.

Bununla yanaşı, “Kristal Abşeron” MTK-dan mənzil almış 4 şəhid - hərbçimizin ümumilikdə 200 min 487 manat məbləğində borcu şirkətin təsisçiləri tərəfindən tam ödənilərək şəhidlərin ailələrinə borcun olmaması barədə arayışlar təqdim edilib.

***

Məsələ ilə bağlı şəhid Teymur Əzizovun həyat yoldaşı Zeynəb Səmədova “Qafqazinfo”ya açıqlamasında bildirib ki, T.Əzizovun şirkətin açıqlamasındakı kimi dörd yox, bir evi olub:

“Ev bank yolu ilə yox, daxili kredit hesabına götürülüb. 195 min manat qiyməti olan evdən 95 min manat ödəniş etmişik. Qalan 100 min borcun 57 min manatı faiz hissəsidir. Biz də buna görə şirkətə müraciət etdik ki, həmin faizlər silinsin. Amma onlar bizə dedilər ki, 20 min manat silə bilərlər.

Aylıq ödənişlərdə isə pandemiya zamanı yoldaşım təlimlərdə olduğu üçün altı ay gecikmə oldu, sonradan həmin ayların ödənişlərini etdik, qəbzləri də var. Bizim orada bundan başqa, bir obyekt, bir qarajımız var. Onların da ödənişlərini edirik və bunlarla bağlı heç bir güzəşt tələb etməmişik”.