Dağlıq Qarabağa qanunsuz səfərlər etmiş bloqer Aleksandr Lapşinin indiki mərhələdə vətəndaşı olduğu ölkələrdən birinə ekstradisiya edilməsi mümkün deyil.

“Qafqazinfo” xəbər verir ki, bu barədə Trend-ə açıqlamasında A.Lapşinin vəkili Səfər Hüseynov məlumat verib. O bildirib ki, A.Lapşinlə bağlı başlanmış cinayət işi üzrə istintaq davam etdirilir: "Hələlik istintaq gedir. İstintaq yekunlaşandan sonra Lapşin məhkəmə qarşısına çıxarılmalıdır. Məhkəmə hökmü olandan sonra onun vətəndaşı olduğu ölkələrdən birinə verilməsi ilə bağlı məsələyə baxıla bilər. Məhkəmə hökmünə qədər Lapşin heç bir ölkəyə ekstradisiya edilə bilməz".

Vəkil qeyd edib ki, hələlik Lapşinin ailə üzvləri ona müraciət etməyib: "Ailəsi görüş üçün səfirliyə müraciət etməlidir. Bu müraciətdən sonra səfirliyin vasitəsilə ailə üzvləri mənə müraciət edə bilər. Mənə hələ bu barədə heç kim müraciət etməyib. Ailə üzvləri Lapşinlə mənim vasitəmlə görüşə bilər".

Xatırladaq ki, Azərbaycan Baş Prokurorluğunun Ağır cinayətlərə dair işlər üzrə istintaq idarəsində istintaqı aparılan cinayət işi üzrə ayrı-ayrı dövlətlərin vətəndaşlığını daşıyan A.Lapşin Azərbaycanın dövlət sərhədini qanunsuz olaraq keçmə, ərazi bütövlüyünü parçalamağa yönələn açıq çağırışlar etmə əməllərinə görə təqsirləndirilən şəxs qismində cəlb edilib beynəlxalq və dövlətlərarası axtarışa verilməsi ilə əlaqədar 2016-cı il dekabrın 15-də Belarusın hüquq-mühafizə orqanları tərəfindən Minskdə saxlanılaraq, 2017-ci il fevralın 7-də Azərbaycana ekstradisiya olunub.